Лінкі ўнівэрсальнага доступу

ЗАБІТЫЯ ПАД ВАРШАВАЙ ЗЛАЧЫНЦЫ МЕЛІ ПРЫНАМСІ 40 АДЗІНАК АГНЯСТРЭЛЬНАЙ ЗБРОІ


Аляксей Дзiкавiцкi, Варшава

Паводле супрацоўнікаў Міністэрства ўнутраных справаў Польшчы, бандыты мелі прынамсі сорак адзінак агнястрэльнай зброі, дзясяткі тысячаў патронаў і шмат мінаў. Польскія праваахоўчыя органы ўпершыню мелі дачыненьне з так добра ўзброенымі злачынцамі.

Нагадаю, што на мінулым тыдні ўначы зь серады на чацьвер польская паліцыя распачала апэрацыю ў справе затрыманьня двух небясьпечных злачынцаў, якія ўкрываліся ў катэджы ў мястэчку Магдаленка каля Варшавы.

Паліцыянты, аднак, сустрэлі неспадзяваны супраціў крымінальнікаў, якія ўжылі мноства гранатаў і аўтаматычную зброю, а таксама замінавалі падворак. У часе штурму бандыты здэтанавалі адмысловую бомбу, наладаваную цьвікамі і шурупамі, якая параніла шмат супрацоўнікаў паліцыі. Паведамлялася, што гэткія бомбы выкарыстоўваюць тэрарысты, а зрабіў яе хутчэй за ўсё адзін з бандытаў, беларус Ігар П. – былы супрацоўнік КГБ, што служыў у колішняй Нямецкай Дэмакратычнай Рэспубліцы.

У выніку беспрэцэдэнтнай у гісторыі польскай паліцыі сутычкі са злачынцамі, у часе якой быў ужыты нават бронетранспарцёр, загінуў адзін паліцыянт, а 15 былі параненыя.

Ніякіх новых зьвестак што да асобаў крымінальнікаў пакуль няма. Высьвятлілася, аднак, што яны загінулі не ад паліцэйскіх куляў, а ад выбухаў уласных гранатаў, што захоўваліся ў доме.

Паведамляецца, што Ігар П., які ўжо даўно знаходзіўся ў міжнародным вышуку, магчыма, быў кіраўнікоў небясьпечнай злачыннай групы, якая летась напала на паліцыянтаў, якія хацелі канфіскаваць скрадзены злачынцамі груз. Тады ў часе страляніны адзін паліцыянт загінуў.

Пакуль абсалютна дакладана невядома, ці быў усё ж Ігар П. супрацоўнікам КГБ. На мінулым тыдні, міністар унутраных справаў Польшчы назваў Ігара П. “хлопцам з КГБ”. У польскіх мэдыях, аднак, часьцей ужывалася словазлучэньне “жаўнер КГБ”, а гэта можа значыць, што злачынец калісьці папросту праходзіў тэрміновую службу у гэтага тыпу войсках.

Паводле неафіцыйнай інфармацыі ад аднаго з супрацоўнікаў беларускай амбасады ў Варшаве, Ігар П. нават ня меў скончанай сярэдняй адукацыі, таму ня мог быць афіцэрам КГБ.

Сьледзтва, у гэтай справе, якое праводзяць цяпер найлепшыя польскія адмыслоўцы, магчыма, дасьць адказ на пытаньне, адкуль тады грамадзянін Беларусі ведаў тэхналёгію вырабленьня тэрарыстычных бомбаў.
XS
SM
MD
LG