Ці павінныя Злучаныя Штаты Амэрыкі распачынаць вайсковыя дзеяньні супраць Іраку, не атрымаўшы падтрымкі Арганізацыі Аб’яднаных Нацый? Меркаваньні на гэты конт апытаных мной выпадковых мінакоў падзяліліся.
(Спадарыня: ) “Трэба караць тых, хто спрычыніўся да масавых забойстваў. Я лічу, што трэба абавязкова”.
(Другая спадарыня: ) “А я лічу, што вайна не павінная быць”.
(Трэцяя спадарыня: ) “Вайна ў наш напружаны час — вельмі канфліктнае пытаньне. Яшчэ калі мы ведаем пра Карэю... Здаецца, спачатку трэба вырашыць пытаньні там, а потым ужо брацца за Ірак”.
(Чацьвертая спадарыня: ) “ЗША ўвогуле ня мусяць распачынаць вайсковыя дзеяньні ў Іраку, бо там зноўку ж людзі, шкода навакольнаму асяродзьдзю, эканоміцы... Пацерпіць і Эўропа, і нейкія рэшткі дакацяцца і да нас”.
(Спадар: ) “Зло мусіць быць пакаранае, незалежна ад таго, якія тыя ці іншыя падставы ўзьнікаюць у той ці іншай сытуацыі. Сёняшняя сытуацыя вакол дыктатара Хусэйна, як ні парадаксальна, вельмі завязана на сытуацыі ў Беларусі. Як да Іраку многія краіны рэалізуюць стратэгію падвойнага стаўленьня да правоў чалавека, так і да аўтарытарнага рэжыму Лукашэнкі сёньня Эўропа прыстасавала палітыку падвойных стандартаў”.
(Другі спадар: ) “Тэрарызм павінен быць зьнішчаны пад корань. Усе ведаюць, якую пагрозу стварае Садам Хусэйн і ягоны рэжым для міжнароднага грамадзтва, асабліва, што тычыцца тэрарыстычных актаў”.
(Трэці спадар: ) “Я лічу, што ЗША не павінныя распачынаць вайну супраць Іраку. Я лічу, што на зямлі павінен быць мір”.
У выпадку, калі Злучаныя Штаты Амэрыкі ўсё ж распачнуць вайсковую апэрацыю супраць Іраку бяз згоды ААН, што стане з самой Арганізацыяй Аб’яднаных Нацый, якім чынам гэта паўплывае на яе дзейнасьць і аўтарытэт у сьвеце? Адказы на гэтае пытаньне былі наступныя...
(Спадарыня: ) “Калі вайсковыя дзеяньні распачнуцца безь яе згоды, то навошта яна існуе? Яна ж створаная з мэтаю, каб пазьбегнуць вайны ў сьвеце”.
(Спадар: ) “ААН будзе вымушаная ў рэшце рэшт пагадзіцца з пазыцыяй ЗША і падтрымаць гэтую акцыю”.
(Другі спадар: ) “Я не лічу, што яна распадзецца, а наадварот, у яе войдуць яшчэ больш краінаў, якія аб’яднаюцца ў кааліцыю, якая будзе супраць вайны”.
(Трэці спадар: ) “Краіны будуць выходзіць з ААН. Праз 5 гадоў гэтай арганізацыі ўжо ня будзе”.
(Спадарыня: ) “Я думаю, што пачнецца нейкі вэрхал у сьвеце, таму што ААН — гэта вельмі паважаная структура, і ЗША ня мусяць абыходзіць яе”.
Якім чынам магчыма ўтаймаваць ірацкага дыктатара Садама Хусэйна? Як стабілізаваць сытуацыю ў гэтай краіне і на Блізкім Усходзе?..
(Спадарыня: ) “Я лічу, што патрэбная нейкая справядлівасьць, і вінаватых патрэбна пакараць”.
(Спадар: ) “Трэба ўвесьці ААН-аўскія войскі”.
(Другі спадар: ) “Калі не вайсковыя дзеяньні, то, я мяркую, што ізноў жа сіла нараджае сілу”.
(Трэці спадар: ) “Гэта напэўна зараз немагчыма, таму што яго падтрымлівае народ. Народ слаба інфармаваны, але вельмі патрыятычны”.
(Чацьверты спадар: ) “Я лічу, што трэба працягваць перамовы”.
(Пяты спадар: ) “Я лічу, што Хусэйн — гэта такі палітык, які разумее толькі мову сілы, і таму зь ім трэба змагацца толькі ягонымі мэтадамі”.
Гэта былі меркаваньні мінакоў на менскіх вуліцаў наконт магчымай вайсковай апэрацыі супраць ірацкага рэжыму.
