(Сурвілла: ) “Прэзыдыюм прысьвяціў шмат увагі праекту закону, прадстаўленаму ў Кангрэсе кангрэсмэнам Крыстофэрам Сьмітам пад загалоўкам “Belarus Democracy Act 2003” – “Акт аб дэмакратыі ў Беларусі 2003”. Было вырашана падтрымаць гэты праект закону. Як вам ведама, закон выступае ў абарону дэмакратыі, а таксама сувэрэнітэту і незалежнасьці Беларусі.
На парадку дня было сьвяткаваньне дня 25 сакавіка, якое ў гэтым годзе мусіць быць адказам Пуціну і прайсьці пад лёзунгам “Не – інтэграцыі!”
Разглядалася пытаньне ўвядзеньня расейскага рубля ў Беларусі, пытаньне вельмі паважнае, бо гэта было б пачаткам фактычнай страты сувэрэннасьці Беларусі. Разглядаліся таксама пытаньні мясцовых выбараў у Беларусі, кантакты з Захадам і расейскі фактар, які зьяўляецца, як заўсёды, найбольшай небясьпекай нашай дзяржаўнасьці”.
