Дружнымі абвяржэньнямі адказалі прэсавыя аддзелы беларускіх спэцслужбаў на зьвесткі польскіх журналістаў, паводле якіх зь сярэдзіны сьнежня нібыта будзе аслаблены рэжым аховы беларуска-польскай мяжы.
“Гэта прынамсі лухта, калі не правакацыя”, — заявіў супрацоўнік прэсавай службы Камітэту памежных войскаў Уладзімер Несьцяровіч. Яму нічога невядома пра нібыта існуючую дамову з КГБ аб паслабленьні кантролю за мяжой напярэдадні калядных сьвятаў, і ён ня верыць, што такое ўвогуле магчыма.
(Несьцяровіч: ) “У нас заўсёды, яшчэ з савецкага часу, на сьвяты звычайна памежнікі нясуць службу нават больш пільна, чым у звычайныя дні. Усё робіцца, каб ніхто мяжу не парушыў. Так было, ёсьць і будзе, таму інакш як лухтой гэтыя зьвесткі не назавеш”.
Уладзімер Несьцяровіч заклікаў ня ставіцца сур’ёзна і да зьвестак, паводле якіх мяжа нібыта будзе часткова адкрытая ў раёне Маларыты, Берасьця і ў Белавескай пушчы. Гэтыя раёны, сьцьвярджае памежнік, у рэжыме аховы нічым не адрозьніваюцца ад іншых, і кантроль там такі самы.
У КГБ краіны таксама рашуча абверглі зьвесткі польскіх журналістаў. Адказны за кантакты з мэдыямі супрацоўнік КГБ Аляксандар Базанаў існаваньне нейкай “інструкцыі”, якая нібыта ўзгадняе сумесныя дзеяньні супрацоўнікаў КГБ з памежнікамі, назваў “хворай фантазіяй”.
(Базанаў: ) “За памежнікаў не адкажу, мы не ахоўваем мяжу, як яны, а ў нас пра такія інструкцыі мне невядома. І мала верыцца, што яны могуць быць. З чаго раптам? Закон аб ахове мяжы не мяняўся, нічога не зьмянілася”.
У Савеце бясьпекі й Міністэрстве ўнутраных справаў абверглі некаторыя іншыя зьвесткі, пра якія паведамілі журналісты польскага часопісу “Wprost”. Гэтак, там ніхто ня ведае пра існаваньне ў Магілёве і райцэнтры Дрыбін лягераў уцекачоў з Афганістану, Чачэніі, Ірану ды іншых краінаў Усходу. “Такіх лягераў на тэрыторыі Беларусі ўвогуле няма”, — заявіў супрацоўнік Савету бясьпекі.
А прэсавы сакратар МУС Зьміцер Партон абверг цьверджаньне польскіх журналістаў, паводле якога апошнім часам міліцыянты нібыта менш затрымліваюць нелегалаў за парушэньні закону аб знаходжаньні ў Беларусі. Зьміцер Партон прывёў прыклад, калі днямі ў Менску было затрымана і дэпартавана звыш сарака нелегалаў з усходу.
Што да прычынаў зьяўленьня абвінавачаньняў на адрас беларускіх памежнікаў і спэцслужбаў, то супрацоўнік Савету бясьпекі, які не пажадаў назваць сябе, мяркуе, што гэтыя зьвесткі маглі справакаваць польскія памежнікі, зацікаўленыя ў павелічэньні фінансаваньня на ахову мяжы зь Беларусьсю. Гэтай вэрсіі прытрымліваецца і прэсавы сакратар МУС Зьміцер Партон. Ён выказваецца за тое, каб быў улічаны і інтарэс беларускага боку.
(Партон: ) “Магчыма, гэтыя чуткі ў тым ліку спарадзіла і тое, што Беларусь ня раз заяўляла, што мы стрымліваем 90% нелегальных імігрантаў, а заходнія краіны ніяк не ўлічваюць гэтага ў фінансаваньні праграмаў па ахове мяжы з усходу. Паводле нашых зьвестак, усё фінансаваньне ідзе палякам, хаця яны маюць менш дачыненьня да жорсткай аховы мяжы, бо гэта на нашым баку з савецкага часу захаваліся калючы дрот і кантрольна-сьледавая стужка”.
Між тым, вось што мне распавёў менскі журналіст Мікалай М., які нядаўна пабываў побач з гэтай мяжоў у Белавескай пушчы. “Я не зьбіраўся паўтараць экспэрымэнт Паўла Шарамета і хадзіць за мяжу дзеля праверкі, але там, дзе я быў, зрабіць гэта было лёгка. Дастаткова за 1500 рублёў набыць квіток у вальеры, дзе турысты назіраюць за жывёламі, прайсьці гэтыя вальеры, і там да польскай мяжы застаецца мэтраў 300–500. Яна добра бачная. Ніякага дроту там няма — ідзі наўпрост і будзеш у Польшчы”.
