Менскую канфэрэнцыю арганізаваў Беларускі дзяржаўны ўнівэрсытэт. Ужо празь некалькі гадоў Беларусь чакаюць істотныя геапалітычныя зьмены. Пасьля далучэньня Польшчы, Літвы ды Латвіі да Эўразьвязу Беларусь стане памежнай краінай з аб’яднанай Эўропай. Як паведаміў з трыбуны сёньняшняй канфэрэнцыі старшыня дэлегацыі Эўрапарлямэнту ў пытаньнях супрацоўніцтва зь Беларусьсю, Украінай і Малдовай Ян Віерсма, прадстаўнікі эўрапейскіх структураў ужо сёньня мусяць выпрацоўваць падыходы да новай суседкі Эўразьвязу.
(Віерсма: ) “Вядома ж, некаторыя падрыхтоўчыя захады дзеля ўступленьня новых сяброў у Эўразьвяз павінныя быць зробленыя загадзя. З гэтай прычыны мы і прыехалі ў Беларусь, кантактуем з палітыкамі, дзяржаўнымі дзеячамі. Мы абмяркоўваем, як будуць складвацца нашы стасункі. Мы хочам, каб Беларусь скарыстала новыя магчымасьці ў эканамічнай сфэры, што адкрываюцца па часе. Мы разумеем, што з пашырэньнем Эўразьвязу яго памежная сыстэма сутыкнецца з нарастаньнем новых праблемаў — як нелегальная міграцыя і зьвязаная з гэтым злачыннасьць”.
Ён падкрэсьліў, што новыя праблемы могуць быць вырашаныя толькі з дапамогай новых суседзяў, у тым ліку Беларусі.
Сябра дэлегацыі Эўрапарлямэнту Элізабэт Шродтэр нагадала ўдзельнікам канфэрэнцыі, што Польшча, Літва, Латвія атрымалі магчымасьць далучыцца да перадавых эўрапейскіх дзяржаваў дзякуючы дэмакратычным пераўтварэньням у сваіх краінах. Беларусы, найперш моладзь, паводле яе, маюць перад сабою добры прыклад суседзяў. Спадарыня Шродтэр ня выключыла, што настане час, калі й Беларусь будзе ў ліку сяброў Эўразьвязу.
Кіраўнік дэлегацыі Эўрапейскай камісіі ў Беларусі амбасадар Жустэн паведаміў, што з пашырэньнем Эўразьвязу павялічыцца колькасьць праграмаў супрацоўніцтва зь Менскам. Як падкрэсьліў спадар Жустэн, Эўразьвяз зацікаўлены ва ўстойлівым працэсе рэформаў у Беларусі, стварэньні тут надзейных дэмакратычных і палітычных інстытутаў.
