Лінкі ўнівэрсальнага доступу

АБ’ЯДНАНЫЯ САЦЫЯЛ-ДЭМАКРАТЫ ПРАВЯЛІ НЕСАНКЦЫЯНАВАНЫ ПІКЕТ КАЛЯ МІНІСТЭРСТВА ЮСТЫЦЫІ


Альгерд Невяроўскі, Менск

Каля дзесяці актывістаў АСДП на чале са сваімі лідэрамі Валянцінай Палевіковай і Аляксеем Каралём прыйшлі сёньня раніцай да будынка Міністэрства юстыцыі. Яны трымалі плякаты з надпісамі: “Ёсьць такая партыя — АСДП!”, “Патрабуем рэгістрацыі Аб’яднанай сацыял-дэмакратычнай партыі!” ды іншымі. Лідэрка АСДП Валянціна Палевікова так патлумачыла мэту акцыі:

(Палевікова: ) “Мы патрабуем, каб была зарэгістраваная Аб’яднаная сацыял-дэмакратычная партыя. Мінюст нам адмовіў. Сёньня нашая справа знаходзіцца ў Вярхоўным судзе. Мы лічым, што Мінюст прыняў несправядлівае рашэньне”.

Пікетоўцы таксама пратэставалі супраць непрызнаньня партыі “Надзея” пад кіраўніцтвам спадарыні Палевіковай.

Фармальная прычына адмовы ў рэгістрацыі АСДП — тое, што сярод яе заснавальнікаў чыноўнікі Мінюсту выявілі непаўнагадовых асобаў. Але намесьнік старшыні АСДП Аляксей Кароль перакананы, што прычына ў іншым:

(Кароль: ) “Прычына тая ж, па якой ідзе перасьлед апазыцыі. На палітычным полі зьяўляецца партыя, якая імкнецца аб’яднаць сацыял-дэмакратычныя сілы дзеля дэмакратызацыі Беларусі”.

Начальнік управы рэгістрацыі грамадзкіх аб’яднаньняў Мінюсту Міхаіл Сухінін спрабаваў абвінаваціць пікетоўцаў у ціску на суд, бо неўзабаве ў Вярхоўным судзе будзе разглядаца скарга АСДП:

(Сухінін: ) “Ціск на суд праз грамадзкасьць, калі справа ў судзе — забаронена законам”.

Пікет працягваўся прыкладна паўгадзіны. Нягледзячы на тое, што ўлады не давалі дазволу на яго правядзеньне, міліцыя пікетоўцам не перашкаджала.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG