Два дні таму Менскі гарвыканкам забараніў правядзеньне масавай акцыі 17 лістапада, бо яе арганізатарамі выступілі прыватныя асобы, а ня партыі. І вось раптам у гарвыканкам запрасілі арганізатараў акцыі Паўла Знаўца і Сяргея Высоцкага ды прапанавалі ім кампрамісны варыянт — пачаць акцыю шэсьцем з плошчы Якуба Коласа і скончыць мітынгам на плошчы Бангалор.
Кіраўніцтва БНФ прапанавала іншы варыянт, паводле якога мітынг мае адбыцца на пляцоўцы Акадэміі Навук. Сёньня ў гарадзкой управе міліцыі адбылася сустрэча з арганізатарамі акцыі, дзе прадстаўнікі ўладаў сказалі, што ня супраць такога маршруту. Чаму ж улады пайшлі на саступкі апазыцыі. Вось меркаваньне намесьніка старшыні БНФ Віктара Івашкевіча:
(Івашкевіч: ) “У сувязі з абвастрэньнем адносінаў з Расеяй, з аднаго боку, і з Захадам з другога, у сэнсе, што колюць вочы прэзыдэнту парушэньнем правоў чалавека, чарговы разгон-хапун уладам не патрэбны”.
Кіраўнікі БНФ гавораць, што хочуць правесьці мірную акцыю без супрацьстаяньня міліцыі і затрыманьняў яе ўдзельнікаў.
Са сваімі старэйшымі калегамі не пагаджаюцца актывісты Маладога Фронту і Партыі свабоды. Яны заяўляюць, што 17 лістапада павядуць калёну ў цэнтар Менску. Гаворыць лідэр маладафронтаўцаў Павал Севярынец:
(Севярынец: ) “Гэтыя саступкі ёсьць пасткай. Моладзь, якая была гатовая ісьці на рашучы варыянт, на варыянт па цэнтральных вуліцах настойвае на тым, каб ісьці ў цэнтар у кірунку плошчы Незалежнасьці й расейскай амбасады, каб змагацца за незалежнасьць. А старэйшае пакаленьне лічыць годным варыянтам ісьці на Ўсход, у кірунку Акадэміі Навук. Самае кепскае, што можа быць — гэта дзьве калёны, якія пойдуць у супрацьлеглыя бакі”.
Кіраўнік Маладога Фронту, аднак, спадзяецца, што ў наступныя дні паміж моладзьдзю і старэйшым пакаленьнем апазыцыі будзе дасягнуты кампраміс.