Лінкі ўнівэрсальнага доступу

АМАЛЬ ДВА МЕСЯЦЫ МАГІЛЁЎСКІЯ РАБОЧЫЯ АДБУДОЎВАЮЦЬ МЯСЦОВУЮ РЭЗЫДЭНЦЫЮ АЛЯКСАНДРА ЛУКАШЭНКІ


Аляксандар Сердзюкоў, Магілёў

Зробленая большая частка працы ў гэтым доме, які будаўнікі называюць “адмысловым гатэлем”. Ужо да 1 лістапада патрэбна надаць будынку эўрапейскі выгляд. Невядома, ці прагучала гэткае пажаданьне з вуснаў Аляксандра Лукашэнкі, які падчас прыезду на Магілёўшчыну часта ігнараваў Шклоў і спыняўся тут, на вуліцы Міронава.

Вядома, што рамонт ініцыявала адміністрацыя Аляксандра Лукашэнкі. Аблвыканкам замовіў рэканструкцыю двум прыватным фірмам — “Рытуал” і “Вэктар”, а таксама будаўнічаму трэсту №12. І хоць будоўля з кожным днём паскараецца, працаўнікі грошай так і не атрымалі. Яны не разумеюць, чаму знаходзяцца сродкі на даражэзныя будаўнічыя матэрыялы, а на заробкі няма. Распавядае рабочы будаўнічага трэста №12 Павал:

(Павал: ) “Мы працуем два месяцы, і я лічу, што гэта няправільна, калі знаходзяцца грошы на матэрыял, а іх няма на заробак для людзей, якія рамантуюць рэзыдэнцыю прэзыдэнта. Гэта ж нібыта твар нашай дзяржавы, а ягоная рэзыдэнцыя — нібыта яго твар”.

Рабочыя прыватных фірмаў казалі менш. Яны шчыра прызнаваліся, што іх палохае пагроза звальненьня з працы і па-рознаму рэагавалі на пытаньні пра затрымкі з заробкамі:

(Спадар: ) “Навошта мне пра гэта казаць?”

(Спадар: ) “Мы працуем верасень, а заробкаў няма.Там зьнізу сядзяць хлопцы, якія толькі што тэлефанавалі кіраўніцтву. Няма грошай”.

(Спадар: ) “Як, яны абяцалі даць заробак сёньня?”

Заробак сёньня будаўнікі не атрымалі, і ня ведаюць, чаму. Прадстаўнікі прыватных фірмаў мяркуюць, што грошы, магчыма, аселі на рахунках іхных гаспадароў, набліжаных да вэртыкалі. Іншыя абвінавачваюць аблвыканкам. Але ж відаць, што рэзыдэнцыю адрамантуюць да 1 лістапада. Будаўнічых матэрыялаў хапае, а рабочыя прыватных фірмаў, якіх палохае звальненьне, страйкаваць не зьбіраюцца.

Папярэднія кіраўнікі дзяржавы былі больш сьціплымі й карысталіся тым, што ёсьць. Тут спыняліся сакратары Цэнтральнага камітэту Камуністычнай партыі Беларусі, пасьля Вячаслаў Кебіч і Станіслаў Шушкевіч, і ніхто зь іх не паспрабаваў упрыгожыць рэзыдэнцыю. А ў беднай дзяржавы, якую ачольвае былы дырэктар саўгасу, грошы на гэта знайшліся. Чаго ня скажаш пра заробкі, запазычанасьць па якіх на Магілёўшчыне дасягае васьмі мільярдаў рублёў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG