Пагроза ўзьнікненьня сытуацыі, калі лідэрам палітычнай апазыцыі прыйдзецца змагацца паміж сабой, існуе. Больш за тое, варыянтаў перакрыжаваньня вельмі шмат. Напрыклад, у адной акрузе хацелі б вылучацца Ўладзімер Нісьцюк і Васіль Шлындзікаў. А ёсьць і такія акругі, дзе патэнцыйных прэтэндэнтаў тры–чатыры і нават больш.
Складаная тэма вымусіла ўдзельнікаў сустрэчы правесьці яе за зачыненымі дзьвярыма. Тым ня менш, некаторыя палітыкі выказалі Радыё Свабода свае ўражаньні і меркаваньні . Гаворыць прадстаўнік Аб’яднанай грамадзянскай партыі Сяргей Альфер:
(Альфер: ) “Мы дамовіліся па тых акругах, дзе ёсьць патэнцыйныя кандыдаты ў дэпутаты, партыйныя структуры будуць працягваць двухбаковыя сустрэчы, каб вызначыць аднаго кандыддата, калі гэта магчыма. Калі гэта немагчыма, дык прынцыпова было вырашана, што кандыдаты ў дэпутаты ад апазыцыйных палітычных партыяў ня будуць у сваёй агітацыйнай працы ўжываць адзін супраць другога брудны PR”.
Найбольшую актыўнасьць у перамовах праявіла Беларуская сацыял-дэмакратычная партыя (“Народная грамада”). Кіраўнік яе менскай філіі Міхась Ганчарык наступным чынам камэнтуе вынікі:
(Ганчарык: ) “Мне падалося, што ўсе партыі могуць дамовіцца пра падзел акругаў. Але ж падзяліць акругі — не галоўнае. Калі ў адной акрузе будуць ісьці некалькі дэмакратычных кандыдатаў, гэта ж нядрэнна. Я лічу, што некалькі кандыдатаў змогуць запрасіць выбарцаў прыйсьці на выбары. Мы ведаем, што на тых выбарах не было патрэбнай колькасьці людзей. Учорашняя сустрэча паказала, што партыі БНФ, АГП, сацыял-дэмакраты, камуністы, Партыя працы гатовыя ісьці на дамовы, на нейкі кампраміс, можа і саступіць моцнаму кандыдату на акрузе”.
Удзельнікі сустрэчы вырашылі, што дэмакраты сумесна зоймуцца і іншымі выбарчымі праблемамі, у прыватнасьці, вылучэньнем cяброў тэрытарыяльных выбарчых камісіяў і назіральнікаў.
