Лінкі ўнівэрсальнага доступу

ЛУКАШЭНКА РЭГУЛЮЕ АРЭНДУ НЕРУХОМАСЬЦІ


Ігар Карней, Менск

У прэзыдэнцкай адміністрацыі кажуць, што ініцыятыва стала вынікам леташняй сустрэчы Лукашэнкі зь дзелавымі коламі краіны і накіраваная на ўпарадкаваньне арэнднай платы. Адмыслоўцы ў справах нерухомасьці сьцьвярджаюць, што ўказ стварае ўмовы для фінансавых злоўжываньняў.
Указ вельмі расплывіста падзяляе юрыдычных і фізычных асобаў на тых, хто цалкам ці часткова вызваляецца ад аплаты арандаваных памяшканьняў, і тых, хто павінен плаціць па максымуму.

У бальшыні краінаў Эўропы паняцьця “базавай стаўкі арэнднай платы” папросту не існуе: паўсюль кошты дыктуе рынак, альбо іншымі словамі — попыт на аб’екты нерухомасьці. Зрэшты, і краінаў, дзе адміністратыўныя і вытворчыя збудаваньні падпарадкоўваюцца нават не дзяржаве, а адпаведнай службе кіраўніка краіны, таксама засталося няшмат.

У адным толькі Менску кіраўніцтва справаў Лукашэнкі валодае амаль сотняй будынкаў, улучна з базамі адпачынку, будынкамі дзяржаўных канцэрнаў, НДІ і нават творчых саюзаў. Па ўсёй краіне такіх аб’ектаў некалькі соцень. Ад сярэдзіны 1990-х бальшыня былых гаспадароў маёмасьці згубіла права нават на сумеснае ўладаньне і вымушаная плаціць паводле гэтак званых мінімальных ставак за квадратны мэтар плошчы. Ад сёньняшняга дня мінімальныя стаўкі зьмяняюцца базавымі велічынямі ў эўра.

Самымі дарагімі для арандатараў па-ранейшаму застаюцца памяшканьні ў сталіцы — 10 эўра за м2. Стаўка 6 эўра вызначаная для аб’ектаў дзяржаўнай нерухомасьці ва ўсіх абласных цэнтрах і асобна — у Бабруйску. Найтаньней каштуюць памяшканьні ў сельскай мясцовасьці — 2 эўра за м2.

Прэзыдэнт Беларускага таварыства ацэншчыкаў Мікалай Трыфынаў лічыць гэтыя кошты неадпаведнымі прыбыткам бальшыні суб’ектаў гаспадараньня.

(Трыфанаў:) “Памеры аплаты вельмі высокія. Калі падлічыць, за колькі гадоў акупляецца будынак, то лічбы ўражваюць. Мы адсочваем кватэрны індэкс: на гэтым тыдні ён 390 даляраў за мэтар квадратны. За сярэдняга ўзроўню офіс плацяць 120 даляраў. Але кватэра назаўсёды, а арэнда за месяц. На грошы, сабраныя арэндай, праз тры гады можна новы будынак узьвесьці. Гэта ж нядобра. Узровень капітальнасьці будынку (згодна з усімі нарматывамі) 70 гадоў. А прыстойна збудаванага (як, напрыклад, Дома ураду) — дык усе сто”.

Указ Лукашэнкі адносна вызначэньня арэнднай платы сёньня надрукаваны ў афіцыйных СМІ з камэнтаром ягонай прэсавай службы. Галоўная выснова — стаўкі арэнднай платы будуць зьменшаныя. Адмыслоўцы, якія рэальна працуюць зь нерухомасьцю, мяркуюць, што спадзявацца на гэта не даводзіцца.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG