Лінкі ўнівэрсальнага доступу

МНОГІЯ ВЕРНІКІ НЕ СПАДЗЯЮЦЦА, ШТО ЎЛАДЫ АДМОВЯЦЦА АД ПРЫНЯЦЬЦЯ ДЫСКРЫМІНАЦЫЙНАГА ЗАКОНУ


Альгерд Невяроўскі, Менск

“Белая кніга” выдадзеная сіламі грамадзянскай ініцыятывы “За свабоднае веравызнаньне”. Гэта зборнік, у якім акрамя новага закону “Аб свабодзе веравызнаньняў і рэлігійных арганізацыяў” апублікаваныя вытрымкі зь беларускай Канстытуцыі, дзе гарантуецца свабода сумленьня, ды шматлікія звароты лідэраў рэлігійных канфэсіяў, палітычных партыяў і грамадзкіх арганізацыяў да ўладаў.

У кнізе таксама зьмешчаныя высновы міжнародных экспэртаў у справе новага закону, прынятага палатай прадстаўнікоў 27 чэрвеня, і шматлікія публікацыі на гэтую тэму зь беларускіх і замежных СМІ.

Гаворыць адна зь лідэраў грамадзянскай ініцыятывы “За свабоднае веравызнаньне” Ірына Жыхар:

(Жыхар: ) “Сёньня мы дакладна ведаем, што 2 кастрычніка савет рэспублікі будзе разглядаць гэты закон. За два з паловай месяца грамадзянская ініцыятыва зрабіла працу, зь якой мы хочам сёньня вас пазнаёміць. Гэта “Белая кніга”. Самае страшнае, калі пачынаецца міжрэлігійны, міжканфэсійны й міжнацыянальны канфлікт. Мы вельмі ня хочам, каб ён адбыўся. Гэта звышмэта нашай грамадзянскай ініцыятывы”.

Арганізатары прэзэнтацыі гавораць, што новы беларускі закон “Аб свабодзе веравызнаньняў” быў разасланы шэрагу экспэртаў з ЗША, Заходняй Эўропы і краінаў суседзяў Беларусі. Выснова гэтых экспэртаў адназначная — такога дыскрымінацыйнага закону, як беларускі, няма нідзе ў цывілізаваным сьвеце. Сваю занепакоенасьць прыняцьцем гэтага закону выказалі ўрад Злучаных Штатаў, Эўразьвяз і многія праваабарончыя арганізацыі.

Гаворыць укладальнік “Белай кнігі” Якаў Басін:

(Басін: ) “Нашая дзяржава сёньня стаіць перад сур’ёзным выбарам. Прыняцьце новага закону можа ня толькі выклікаць рэлігійную дэстабілізацыю ў грамадзтве. Яно адкіне нашае грамадзтва як мінімум на 30–40 гадоў назад, а можа й яшчэ больш. Мы зноў апынемся ў сьпісе рэжымаў, адрынутых міжнароднай супольнасьцю. Нам бы гэтага вельмі не хацелася”.

Укладалальнік кнігі спадзяецца, што прачытаўшы яе, дэпутаты савету рэспублікі й Аляксандар Лукашэнка адумаюцца і хаця б выключаць з закону такія дыскрымінацыйныя палажэньні як рэгістрацыя абшчынаў і аб’яднаньняў, якія налічваюць 20 сябраў ды існуюць у Беларусі ня менш за 10 гадоў, забарона малітоўных сходаў па месцы жыхарства, рэлігійная цэнзура й г.д.

Аднак многія вернікі не спадзяюцца, што ўлады пойдуць на гэта. Гаворыць дэпутат палаты прадстаўнікоў Іван Пашкевіч:

(Пашкевіч: ) “Ці будзе ён прыняты сёньня? На жаль, будзе. Я ў гэтым упэўнены й у мяне няма ніякіх сумненьняў. Таму што я ведаю, хто стаіць за гэтым законам, хто цісьне. Калі намесьнік старшыні палаты прадстаўнікоў спадар Канаплёў кажа, што ён зробіць усё нават у парушэньне канстытуцыі й рэглямэнту, і гэты закон будзе прыняты, ну дык тут ня можа быць камэнтароў”.

Многія пратэстанцкія пастары ўжо рыхтуюцца да працы ва ўмовах падпольля.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG