Лінкі ўнівэрсальнага доступу

АРЫШТАВАНЫ БЫЛЫ СТАРШЫНЯ “МІНСККОМПЛЕКСБАНКУ”


Міхал Стэльмак, Менск

Як паведаміў нашаму радыё начальнік цэнтру інфармацыі ды грамадзкіх сувязяў КГБ Фёдар Котаў, затрыманьне Яўгена Краўцова адбылося яшчэ 26 жніўня. Пра матывы затрыманьня спадар Котаў паведаміў наступнае:

(Котаў: ) “Краўцоў затрыманы паводле падазрэньня ва ўчыненьні злачынства. Ён часова непрацоўны. З красавіка ён не зьяўляецца службовай асобаю банка, але адначасова ён сузаснавальнік, як фізычная асоба, некалькіх камэрцыйных структураў у рэспубліцы. Магу сказаць, што іх блізу дзясятку. Зараз юрыдычна фармулюецца абвінавачаньне, якое будзе яму прад’яўлена бліжэйшым часам”.

Спадар Котаў падкрэсьліў, што ў КГБ няма прэтэнзіяў да “МінскКомплексбанку”, дзе працаваў Яўген Краўцоў.

Яўген Краўцоў належыць да ліку найбольш вядомых беларускіх банкіраў. На пачатку 1990-х ён узначальваў менскую філію гарадзенскага “Комплексбанку”. Пасьля ўтварэньня “МінскКомплексбанку” ён заняў пасаду ягонага кіраўніка.

У “МінскКомплексбанку” ведаюць пра затрыманьне былога старшыні праўленьня, аднак, як і КГБ, ня зьвязваюць гэта зь ягонай дзейнасьцю ў гэтай банкаўскай установе. Вось што зазначыў нашаму радыё на гэты конт выканаўчы дырэктар “МінскКомплексбанку” Алег Кавалёнак:

(Кавалёнак: ) “Краўцоў не працуе з 12 красавіка. Ён пайшоў займацца прадпрымальніцкай дзейнасьцю — адчыніў уласныя фірмы. Ён сышоў з банку з уласнага жаданьня. Таму ніякага дачыненьня з красавіка Краўцоў да банку ня мае. І ў гэтым пляне дзеяньні, якія зьдзейсьненыя ў дачыненьні да Краўцова, дачыненьня да банку таксама ня маюць”.

Дарэчы, паводле словаў прадстаўніка КГБ Котава, абвінавачаньне Яўгену Краўцову можа быць прад’яўленае ўжо заўтра ўраніцу.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG