Лінкі ўнівэрсальнага доступу

НАВІНЫ ЎСЯСЬВЕТНАЙ КУЛЬТУРЫ


Вячаслаў Ракіцкі

Пакуль што Дзюма, паводле ягонага тэстамэнту, пахаваны ў роднай вёсцы Вілер-Катрэ. Аднак прэзыдэнт краіны Жак Шырак вырашыў аддаць даніну пашаны пісьменьніку, які застаецца самым вядомым францускім пісьменьнікам у сьвеце, перанесшы цела ў Пантэон. Мясцовыя чыноўнікі падалі апэляцыю ў Дзяржаўную раду, аднак у Парыжы іхны пазоў адхілілі. Урачыстая цырымонія адбудзецца 3 кастрычніка.

ЗША. Супэрзорка Галівуду Том Круз заявіў, што ён зробіць усё магчымае, каб ягоныя дзеці ніколі не жылі ў ЗША. У інтэрвію брытанскай газэце “Daily Express” актор патлумачыў, што “Злучаныя Штаты пужаюць і псуюць яму настрой”, бо там “людзі безадказныя, і каштоўнасьць чалавечага жыцьця надзвычай нізкая”. Круз заяўляе, што ён не можа надалей заплюшчваць вочы на рост злачыннасьці, квітнеючую карупцыю, сталую пагрозу тэрарызму і няўстойлівае фінансавае становішча краіны. Амэрыканскія мэдыі адзначаюць, што такі сумнеў адносна пэрспэктываў ЗША ўпершыню выказвае асоба такога ўзроўню і стану, як Том Круз. Актор не выключае, што ягоныя прыёмныя дзеці Ізабэла і Конар пераедуць у Аўстралію, дзе жыве сям’я ягонай былой жонкі Ніколь Кідман.

НЯМЕЧЧЫНА. Кампазытар Карл Орф застаецца адзіным стваральнікам араторыі “Карміна Бурана” – такі вырак у аўторак вынес суд у Мюнхэне, які разглядаў зыск дачкі знакамітага філёляга Міхаэля Гофмана пра прызнаньне ейнага бацькі суаўтрам выбітнага твору. Справа ў тым, што Орф кантактаваў з Гофманам і асабіста, і ліставаньнем – абменьваўся зь ім поглядамі на праект кампазыцыі і раіўся адносна выбару тэкстаў сярэднявечных песьняў вагантаў, якія пакладзеныя ў аснову араторыі. Суд не прыняў гэтага аргумэнту і канстатаваў, што хоць камэнтары Гофмана і мелі значэньне для рэалізацыі ідэі, але твор напісаны адным кампазытарам. “Карміна Бурана”, выкананая ўпершыню ў 1937 годзе ў Франкфурце-на-Майне, прынесла Карлу Орфу ўсясьветную славу.

ВЯЛІКАЯ БРЫТАНІЯ. Аўкцыйны дом “Sotheby’s” выставіў на продаж вельмі рэдкую калекцыю асабістых рэчаў, лістоў і зброі адмірала Нэльсана. Аўкцыён адбудзецца ў 195-ю гадавіну Трафальгарскай бітвы 21 кастрычніка. Арганізатары разьлічваюць, што сапраўдны ажыятаж выклічуць два лёты – шаўковы партаманэт са сьлядамі крыві адмірала, які знаходзіўся ў кішэні Нэльсана ў часе Трафальгарскай бітвы, і дыямэнтавая брошка ў выглядзе якару зь ініцыяламі НN (Ноratio Nelson). На думку экспэртаў аўкцыйнага дому, партаманэт прынясе ня меней за 80 тысячаў фунтаў, а брошка – прынамсі 150 тысячаў.

ЗША. Легендарны рок-гурт “Grateful Dead” вяртаецца на сцэну. Ад 1995 году, калі памер заснавальнік каманды Джэры Гарсія, музыкі не давалі канцэртаў, а толькі выпускалі ў сьвет альбомы з запісамі жывых канцэртаў шасьцідзесятых – дзевяностых гадоў. Улады штату Вісконсін нарэшце далі дазвол на два канцэрты 3 і 4 жніўня. Раней яны баяліся, што ў меркаваным для імпрэзаў месцы, разьлічаным на 35 тысячаў чалавек, зьбяруцца ня меней за 200 тысячаў прыхільнікаў гурту. А мясцовых паліцыянтаў для аховы парадку толькі 80 чалавек. Арганізатары канцэртаў паабяцалі зрабіць сур’ёзныя захады бясьпекі. Усе квіткі на абодвы канцэрты прададзеныя.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG