Агульнабеларускі фэстываль нацыянальных культураў праходзіць чацьверты раз. Асфальтавалі гарадзенскія вуліцы і фарбавалі дамы літаральна да апошняй хвіліны. Пра гэта гаварылася на прэсавай канфэрэнцыі, якая адбылася перад адкрыцьцём сьвята.
Першы намесьнік старшыні гарвыканкаму Анатоль Кунаш прызнаўся, што фэст “падсьцёбвае ўлады прыхарошвацца”, аднак яны ўсё адно вечна не пасьпяваюць. І гэта пры тым, што значную частку грошай на падрыхтоўку гораду выбіваюць з прадпрыемстваў, — прызнаўся чыноўнік. Рамонт адной толькі вуліцы Замкавай каштаваў 60 мільёнаў рублёў.
Намесьнік міністра культуры Валеры Гедройц прызнаўся, што Беларускае тэлебачаньне не адрэагавала на прапанову шырэй асьвятляць фэст у сваім эфіры. Замежных карэспандэнтаў у Горадню не запрашалі, заяўкі ад іх таксама не паступалі. Запрошаныя некаторыя замежныя дыпляматы — у прыватнасьці, ізраільскія, украінскія, расейскія. Але ці прыедуць яны, намесьнік міністра ня ведае.
Гарадзенскі фэст рэклямуецца як адзінае ў Эўропе сьвята прадстаўнікоў розных культураў і народаў. Аднак падобныя сьвяты адбыліся нядаўна — напрыклад, у Бэрліне і Варшаве. Асаблівасьцю цяперашняга гарадзенскага фэсту стаў удзел мастацкіх суполак афганскіх і грузінскіх уцекачоў, якімі апякуецца прадстаўніцтва Вярхоўнага камісара ААН у справах уцекачоў.
Мінулым разам падчас адкрыцьця фэстывалю з крытыкай уладаў выступіў тадышні старшыня Саюзу палякаў Тадэвуш Гавін. Ён выказаў пратэст супраць таго, што яны не дазваляюць пабудаваць польскую школу ў Наваградку. Сёлета падобных заяваў не было. Аднак вось што мне сказаў Канстанцін Тарасевіч, старшыня галоўнай рады Саюзу палякаў у Беларусі:
(Тарасевіч: ) “Наконт пабудовы школы: мы ўважаем, што і ў Наваградку мусіць быць пабудаваная польская школа. Таму што ня толькі ў Наваградку, але і ў ваколіцах, у вёсках жыве значная колькасьць людзей польскага паходжаньня, і нядрэнна было ім вывучаць родную мову. А што тычыць школы ў Воранаве, мы ўважаем, што там беспадстаўна гамуецца гэтая справа. Таму што трэба і ўладам, і ўсім прыняць захады, каб прысьпешыць яе пабудову. Мы ўважаем, што там 97% ад агульнага насельніцтва складаюць палякі. Некаторыя кажуць, і афіцыйныя ўлады — 85%. Але гэта ўсё роўна такая лічба, на падставе якой трэба прымаць рашэньне. Нашы законы гэта дазваляюць і нават патрабуюць выкананьня гэтага. Але на жаль, розныя прычыны, і асабліва мясцовае кіраўніцтва, перашкаджаюць гэтаму”.
