Лінкі ўнівэрсальнага доступу

ВЯРХОЎНЫ САВЕТ БЕЛАРУСІ 13-ГА СКЛІКАНЬНЯ ІНІЦЫЮЕ СЛУХАНЬНІ АБ ЛЁСЕ ЗЬНІКЛЫХ БЕЛАРУСКІХ ГРАМАДЗКІХ ДЗЕЯЧОЎ


Уладзімер Глод, Менск

Сёньняшняе паседжаньне пачалося незвычайна — апошнім, 27-м, у залю ўвайшоў Андрэй Клімаў. Дэпутаты Вярхоўнага Савету 13-га скліканьня, некаторыя зь якіх ня бачылі спадара Клімава чатыры гады, сустрэлі яго авацыяй. Андрэй Клімаў сказаў літаральна некалькі словаў. Па-першае, адзначыў, што яму вельмі прыемна пабачыць, што Вярхоўны Савет яшчэ існуе. І па-другое, паводле Андрэя Клімава, вялікая частка грамадзтва зьвязвае свае надзеі менавіта зь Вярхоўным Саветам 13-га скліканьня. Невыпадкова, сказаў Андрэй Клімаў, на зоне да яго зьвярталіся часам проста “дэпутат”.

Лёс Віктара Ганчара і Генадзя Карпенкі, Юрыя Захаранкі і Зьмітра Завадзкага быў сёньня ў цэнтры ўвагі дэпутатаў. Яны аднагалосна вырашылі наступнае паседжаньне прысьвяціць адмысловым слуханьням аб лёсе зьніклых. На яго дэпутаты пастанавілі запрасіць парлямэнтароў з розных краінаў, найперш суседніх, а таксама прадстаўнікоў міжнародных праваабарончых арганізацыяў.

Падобна на тое, што Вярхоўны Савет вырашыў зноўку заявіць пра сваю актыўную дзейнасьць. У прыватнасьці, вырашана правесьці пад эгідай Вярхоўнага Савету адмысловыя слуханьні наконт выбараў у мясцовыя органы ўлады, а таксама вялікі форум з нагоды першай гадавіны апошніх прэзыдэнцкіх выбараў.

На гэтым паседжаньні былы старшыня Нацыянальнага банку Рэспублікі Беларусь Станіслаў Багданкевіч выступіў з аглядам сацыяльна-эканамічнай сытуацыі ў краіне. Зь ягоных словаў вынікае, што Беларусь ня мае магчымасьці сёлета пераадолець стагнацыю. Адсутнасьць сродкаў, неканкурэнтаздольнасьць прадукцыі вымусяць правесьці грашова-крэдытную эмісію беларускага рубля. Прафэсар прагназуе, што інфляцыя замест 20–27% складзе дзесьці 70–100%. А кошт аднаго амэрыканскага даляру ўзрасьце прыкладна да 3 тысяч беларускіх рублёў. Каб гэтага не здарылася, беларускім уладам неабходна знайсьці за межамі краіны прыкладна 300–500 мільёнаў даляраў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG