Лінкі ўнівэрсальнага доступу

ЛЕВЫЯ РЫХТУЮЦЦА ДА ВЫБАРАЎ


Любоў Лунёва, Менск

Пагадненьне аб каардынацыі дзеяньняў падчас мясцовых выбараў падпісалі лідэры Беларускай партыі працы — Аляксандар Бухвостаў, Партыі камуністаў — Сяргей Калякін і “Народнай Грамады” — Мікалай Статкевіч. Яны дамовіліся стварыць выбарчы каардынацыйны цэнтар і пагадзіцца пра падзел акругаў.

Лідэр сацыял-дэмакратаў Мікалай Статкевіч патлумачыў Радыё Свабода, чаму ягоная партыя падпісала пагадненьне толькі з камуністамі й Партыяй працы.

(Статкевіч: ) “Перамовы аб стварэньні адзінай кааліцыі вяліся неаднаразова, былі нашыя прапановы, але рэакцыі ніякай не было. Я папросту вымушаны быў зьвярнуцца да рэгіянаьных структураў правых партыяў — і мы паразумеліся. Па сутнасьці праблемаў падзелаў акругаў з правымі, гэта значыць, што АГП і БНФ ня будзе. Ну, безумоўна, гэта выклікала прыступ лёгкай гістэрыкі ў кіраўнікоў, бо мусім прымушаць, ставіць у калідор — крок направа, крок налева...

Вопыт парлямэнцкіх выбараў 2000 году нам паказвае, як яны ўвесну згаджаліся ісьці на выбары, а летам — байкот. Цяпер ужо ня выпусьцім, павядзем, як кажуць, на вяроўцы. Мы бачым, што не сьпяшаюцца нашыя калегі й мяркуюць стварыць нейкі такі палавінны блёк.

Спадар Вячорка ў інтэрвію, якое надрукавалі ўчора ў газэце “Белорусский рынок”, заявіў, што блёк будзе на базе Каардынацыйнай рады дэмакратычных сілаў. Тады мы вырашылі наступнае: будзе яшчэ адзін блёк на базе Канфэдэрацыі “За сацыяльныя перамены”. Ну, калі кіраўнікі правых партыяў заўпарцяцца і зноў захочуць нейкі праект падаць, круглыя сталы, ці кангрэс дэмсілаў, то ў нас няма часу, бо выбары павінны ісьці зараз”.

Гэтак камэнтуе лідэр “Народнай Грамады” Мікалай Статкевіч падпісанае сёньня кіраўнікамі трох левых партыяў пагадненьне аб каардынацыі дзеяньняў падчас мясцовых выбараў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG