“Злучаныя Штаты ўспрымаюць паведамленьні аб продажы зброі краінам або групоўкам, якія падтрымліваюць або спрыяюць тэрарызму, вельмі сур’ёзна. Мы скарыстоўваем розныя спосабы ціску, у рамках двухбаковых адносінаў з краінай-пастаўшчыком або, калі гэта неабходнае, шляхам санкцыяў з мэтай прадухіліць гэтыя пастаўкі зброі,” – заявіў прадстаўнік Дзярждэпартамэнту Рычард Баўчэр.
Памочнік дзяржсакратара Стывэн Пайфэр паведаміў журналістам у часе свайго трохдзённага візыту ў Менск аб тым, што Злучаныя Штаты атрымалі пераканаўчыя доказы ўдзелу Беларусі ў гандлі зброяй насуперак санкцыям ААН. Паводле Пайфэра, які сустрэўся зь міністрам абароны Беларусі Мальцавым, міністрам замежных справах Хвастовым ды іншымі афіцыйнымі прадстаўнікамі Беларусі, заявіш, што ЗША, у прыватнасьці, валодаюць інфармацыяй аб тым, што ірацкія вайсковыя спэцыялісты знаёміліся ў Беларусі з устаноўкамі супрацьракетнай абароны С-300.
Паводле Баўчэра, у часе візыту амэрыканскіх прадстаўнікоў у Менск, Вашынгтону выказаў афіцыйнаму Менску сваю заклапочанасьць справай продажу зброі.
“Пайфэр паўтарыў у Менску, – паведаміў Дзярждэпартамэнт ЗША, –што Менск не павінен прадаваць зброю ў краіны, якія традыцыйна падтрымліваюць тэрарызм альбо разьдзьмуваюць рэгіянальныя канфлікты”.
Беларускія ўлады з абурэньнем адрэагавалі на абвінавачаньні з боку Пайфэра. Афіцыйны Менск заявіў, што ЗША не падмацавалі свае абвінавачаньні аніякімі доказамі, і што Беларусь выконвае ўсе міжнародныя рэзалюцыі, датычныя гандлю зброяй.