Лінкі ўнівэрсальнага доступу

НА 66-ЦІ ПРАДПРЫЕМСТВАХ ГОМЕЛЬШЧЫНЫ АДКЛЮЧЫЛІ ЭЛЕКТРЫЧНАСЬЦЬ


Казімер Яноўскі, Гомель

Пад санкцыі энэрганагляду трапілі прадпрыемствы, якія нават пасьля афіцыйных папярэджаньняў не разьлічыліся за энэрганосьбіты. Сярод іх найперш прадпрыемствы й фірмы прыватнай альбо калектыўнай формаў уласнасьці. Гэта абласны гандлёвы цэнтар "Гарант", таварыства з дадатковай адказнасьцю "Інвэрт" ды шэраг іншых.

І хаця даўгі ў гэтых суб'ектаў гаспадараньня меншыя, чым у дзяржаўных заводаў і аб'яднаньняў, аднак менавіта да іх энэрганагляд бярэ самыя жорсткія санкцыі. Дзяржаўныя ж прадпрыемствы ратуюць ад поўнага адключэньня "вэртыкальныя" органы.

Адзінае, што ўдаецца энэрганагляду, — абмежаваць так званым "дзяржаўным" даўжнікам спажываньне электрычнасьці. Такіх прадпрыемстваў у рэгіёне сёньня налічваецца больш за 250 — па сутнасьці, кожнае трэцяе з існуючых. І гэта пры тым, што афіцыйныя ўлады заяўляюць пра ажыўленьне вытворчасьці і рост аб'ёмаў выпуску прадукцыі.

Абмежавалі падачу электраэнэргіі нават такім буйным прадпрыемствам як "Гомсельмаш", завод ліцьця і нармаляў, радыёзавод, завод пускавых рухавікоў, рагачоўскі "Дыяпраектар".

Галоўны інжынэр заводу пускавых рухавікоў Міхаіл Гіль паведаміў, што абмежаваньні прывялі да поўнага спыненьня электроднага цэху, тэрмічнага і кампрэсарнага ўчасткаў. Сытуацыя ўскладняецца тым, што на заводзе ня выплацілі калектыву заробкі за верасень, кастрычнік і лістапад. Любое зьніжэньне выпуску прадукцыі аўтаматычна пагаршае фінансавы стан прадпрыемства.

Вытворцы распавядаюць, што сытуацыя з аплатай за энэрганосьбіты пагоршыцца. Рэч у тым, што з новага году Расея падвышае цэны на электраэнэргію. І паколькі асноўную частку яе Беларусь купляе менавіта ва ўсходняй суседкі, то даўгі стануць надзвычай цяжкай ношай для многіх прадпрыемстваў рэгіёну.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG