Спадар Лукашэнка распавёў, што даручыў блізкаму да яго агенцтву "Інтэрфакс-Запад" патэлефанаваць спадарыні Віньнікавай у Вялікабрытанію, каб яна абвергла апублікаванае ў панядзелак інтэрвію, дзе распавядалася пра фінансавыя маніпуляцыі Аляксандра Лукашэнкі ды ягонага атачэньня.
Сёньня Тамара Віньнікава заявіла нашаму радыё, што ёй задавалі пытаньні іншага кшталту.
(Віньнікава: ) "Мне патэлефанавалі зь нейкага... так, Інтэрфаксу й сказалі: Тамара Дзьмітрыеўна, якія рахункі вы назвалі Лукашэнкі ды ў якім банку? Я сказала, што я не называла аніякіх рахункаў у ніякіх банках. Я сказала, што я наадварот сказала: не шукайце рахункаў і не шукайце банкаў. Я сказала: пачытайце тыя матэрыялы, якія ёсьць".
Я вырашыў удакладніць таксама, ці сапраўды спадарыня Віньнікава папрасіла Аляксандра Лукашэнку, як ён сказаў, "прыняць яе ў Менску".
(Карэспандэнт: ) "Вы гатовая ехаць у Менск сустракацца з Лукашэнкам?"
(Віньнікава, сьмяецца: ) "Ты, мяне, Юра, дурыш!"
Тамара Віньнікава дадала, што ў выпадку прыезду ў Менск яна згубіць статус палітычнага ўцекача ў Вялікабрытаніі.
