Некалі былы прэм’ер Лінг палохаў мясцовую намэнклятуру, што калі выбяруць апазыцыянэраў, дык апазыцыя усіх на платах павесіць. Аляксандар Лукашэнка сёньня палохае намэнклятуру дзяржсакратаром ЗША, які блытае шарыкавую ручку з кулямётам.
На сустрэчы з вэртыкальна-гаспадарчым актывам Лукашэнка паведаміў, што беларускія і расейскія спэцслужбы здабылі дакумэнт – тэкст звароту Дзяржсакратара Коліна Паўэла з нагоды 10-х угодкаў незалежнасьці Беларусі і абвінаваціў амэрыканскага амбасадара Майкла Козака ў ягоным аўтарстве. З такімі абвінавачаньнямі кіраўнікі дзяржавы звычайна не выступаюць – чаму Лукашэка сёньня гэта зрабіў? Вядома, Аляксандар Лукашэнка робіць шмат чаго, што звычайна ня робяць кіраўнікі дзяржаваў – не выганяюць дыпляматаў зь іх рэзыдэнцыяў, не катаюцца на ролікавых лыжах пасярод лета ў цэнтры сваіх сталіц.
Але заява пра віншаваньні дзяржсаратара Коліна Паўэла – насамрэч ніякае не абвінавачаньне і нават не раскрыцьцё тайнаў спэцслужбаў. Расейская і беларуская разьведкі супрацоўнічаюць адкрыта, у рамках легітымнасьці самога Лукашэнкі – цяжка сказаць нават, ці існуе самастойная беларуская разьведка. І што яны ўведалі – фактычна чарнавік перапіскі паміж Вашынгтонам і Масквой, самая звычайная практыка падрыхтоўкі падобных дакумэнтаў.
Лукашэнка загаварыў пра заяву Коліна Паўэла, бо яна вельмі непрыемная для кіраўніка, які растаптаў дэмакратыю, загнаў эканоміку ў стагнацыю, абвінавачваецца ў зьнішчэньні апанэнтаў і пры гэтым спадзяецца на міжнароднае прызнаньне.
Галоўная мэта ўсіх сёньняшніх жарсьцяў пра анты-беларускую апэрацыю “Белы бусел”, пра дзяржсакратара, які быццам блытае шарыкавую ручку і аўтамат, – напалохаць прывезеную ў Менск намэнклятуру і празь яе – выбаршчыкаў, умацаваць вобраз ворага і асаднага становішча, а таксама адзінага народнага абаронцы – самога прамоўцы.
