Лінкі ўнівэрсальнага доступу

СПАРАЛІЗАВАНАЯ ПРАЦА ПЕРШАСНЫХ АРГАНІЗАЦЫЯЎ ПРАФСАЮЗУ АПК


Казімер Яноўскі, Гомель

Старшыня Гомельскага абкаму прафсаюзаў АПК Уладзімер Навумчык сьцьвярджае, што ў калгасах і саўгасах рэгіёну заблякаваныя сотні мільёнаў рублёў прафсаюзных грошай.

На Гомельшчыне памятаюць, як Аляксандар Лукашэнка напалохаўся актыўнасьці прафсаюзаў ды пагражаў забараніць бугальтэрыям прадпрыемстваў і калгасаў утрымліваць прафсаюзныя складкі з заробку. Маўляў, на тое няма волі шараговых працаўнікоў.

Мэта ўціску была відавочная: пазбавіць прафсаюзныя арганізацыі фінансавай падтрымкі.

Прафсаюзы адрэагавалі на пагрозу: сабралі заявы чальцоў пра добраахвотнае ўтрыманьне праз бугальтэрыі 1% заробку на прафсаюзныя справы. Аднак прафсаюзныя фармаваньні патрапілі ў чарговую пастку — зноў-такі фінансавую.

Распавядае старшыня абкаму прафсаюзу працаўнікоў аграпрамкомплексу Ўладзімер Навумчык:

(Навумчык: ) "З улікам таго, што зараз гаспадаркі закрэдытаваныя — ляжаць там розныя плацяжы за даўгі, то даручэньні адносна прафсаюзных складак таксама складаюць у агульны стос. Грошы праз банк на рахункі прафсаюзных арганізацыяў патрапіць ня могуць. Іх калгасы скарыстоўваюць на свае патрэбы".

Паводле ягонай інфармацыі, бугальтэрыі калгасаў і саўгасаў рэгіёну заблякавалі зараз 259 мільёнаў рублёў прафсаюзных складак.

(Навумчык: ) "Як вынік, спаралізаваная праца першасных арганізацыяў. Нельга правесьці ніякіх мерапрыемстваў, наведаць у шпіталі хворага, аказаць чалавеку матэрыяльную дапамогу", — кажа старшыня прафсаюзу аграпрамысловага комплексу.

Пра сытуацыю з прафсаюзнымі складкамі спадар Навумчык паінфармаваў старшыню аблвыканкаму Аляксандра Якабсона падчас сустрэчы ў Доме прафсаюзаў. Для галоўнага вэртыкальшчыка вобласьці гэта ня стала нечаканай навіной. На словах жа ён пагадзіўся, што так далей працягвацца ня можа.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG