Лінкі ўнівэрсальнага доступу

“ЦЫТАДЭЛЬ” У ПАДТРЫМКУ ЛУКАШЭНКІ ПРАВЯЛА СХОД І Ў ПІНСКУ


Аляксей Дзікавіцкі, Пінск

Учора ўвечары ў Пінскім гарадзкім доме культуры мясцовыя вэртыкальшчыкі сабралі каля 600 чалавек на сустрэчу з актывістамі пралукашэнкаўскага грамадзкага аб'яднаньня "Цытадэль".

Пляц каля Дому культуры быў застаўлены калгаснымі аўтобусамі ды службовымі легкавікамі, на якіх у працоўны час у горад прыехалі старшыні калгасаў ды сельсаветчыкі. Дарэчы, актавую залю дзеля сустрэчы паводле асабістага загаду старшыні гарвыканкаму Васіля Шуста далі бясплатна.

На сустрэчы, акрамя Васіля Даўгалёва і Пятра Пракаповіча, прысутнічалі таксама начальнік беларускай чыгункі Ўладзімер Рахманько, прэзыдэнт канцэрну "Белэнэрга" Яўген Мішук, дэпутаты "палаты прадстаўнікоў" ад Піншчыны ды іншыя чыноўнікі.

У часе сустрэчы, куды карэспандэнта Радыё Свабода выканкамаўскія чыноўнікі Лявоцкі і Берасьцень не пусьцілі, выступоўцы пераконвалі прысутных, што калі на выбарах не пераможа Лукашэнка, дык у Беларусі будзе галеча. Старшыня Берасьцейскага аблвыканкаму Васіль Даўгалёў сказаў: "Мы мусім казаць народу праўду. Так, зараз дрэнна, мала грошай, яшчэ дрэнна жывем, але ж мы рухаемся. Мы памыляліся, ня ўсё атрымлівалася, але мы маем каманду, якая ўжо ўмее ды ведае, як працаваць, таму мы не павінны дапусьціць бэнээфаўцаў да ўлады".

Пётар Пракаповіч пераконваў прысутных, што Беларусь будуе сацыяльна-арыентаваную рынкавую эканоміку паводле эўрапейскага ўзору ды мае добрыя эканамічныя паказчыкі. Спадар Пракаповіч адзначыў: "Кандыдаты, якія вырасьлі на глебе БНФ ды лібэральнай партыі, прывядуць нашую краіну да хаосу, і гэтага дапусьціць нельга".

Варта адзначыць, што ў Пінску першасныя арганізацыі "Цытадэлі" ствараюцца пад прымусам. У працоўны час на прадпрыемствах распаўсюджваецца статут гэтай арганізацыі ды гатовыя блянкі заяваў на ўступленьне. Адметна, што найбольш зацятымі актывістамі "Цытадэлі" ў Пінску ёсьць тыя чыноўнікі, што на мінулых прэзыдэнцкіх выбарах стваралі аналягічную арганізацыю, але ў падтрымку Кебіча.

Варта таксама нагадаць, што агітацыя за прэтэндэнтаў на пасаду прэзыдэнта да афіцыйнай рэгістрацыі кандыдатаў ёсьць парушэньнем закону.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG