Лінкі ўнівэрсальнага доступу

МАЛАДЫ ФРОНТ ПАВІНШАВАЎ ПАМЕЖНІКАЎ З ПРАФЭСІЙНЫМ СЬВЯТАМ


Альгерд Невяроўскі, Менск

Перад пачаткам сёньняшняй акцыі, у якой бралі ўдзел 7 чалавек, арганізатар Аляксей Талстоў так патлумачыў мэту мерапрыемства:

(Талстоў: ) "Мы думаем павіншаваць гэтых людзей зь іхным прафэсійным сьвятам. У нас усходняя мяжа зьяўляецца адной з галоўных, празь яе на нашую тэрыторыю трапляе шмат нелегалаў, шмат наркотыкаў, больш чым праз заходнюю й астатнія. Мы хочам павіншаваць памежнікаў у гэты дзень і пазычыць ім нармалёва ахоўваць нашыя межы і выконваць свае абавязкі".

Пасьля сябры Маладога Фронту зь бел-чырвона-белымі букетамі кветак накіраваліся ў Дзяржкамітэт памежных войскаў. На ўваходзе іх сустрэў дзяжурны падпалкоўнік.

Акрамя кветак, маладафронтаўцы перадалі памежнікам адмысловы зварот-віншаваньне. Аўтары ягоныя адзначаюць, што "Вось ужо 7 гадоў у краіне пануе самаўладзтва, страх і гвалт. Няма нармалёвых межаў перад нашэсьцем усходняга крыміналу, нелегалаў і наркотыкаў".

Маладафронтаўцы заклікаюць беларускіх памежнікаў мужна абараняць межы, а таксама ўзяць актыўны ўдзел у прэзыдэнцкіх выбарах пад лёзунгам "Даеш новага прэзыдэнта, а былога — за мяжу".

У пасткрыптуме свайго звароту маладафронтаўцы перадаюць віншаванньні Віктару Л. (Відаць, яны мелі на ўвазе старэйшага сына Аляксандра Лукашэнкі, які ёсьць капітанам памежных войскаў і нядаўна атрымаў за службу мэдаль ад бацькі.) Маладафронтаўцы заклікаюць Віцю добра ахоўваць усходнюю мяжу, за што ён можа атрымаць яшчэ адну ўзнагароду.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG