Дзейнаму старшыні АБСЭ міністру замежных справаў Румыніі Мірчу Джэану сёньня накіраваны адказ Аляксандра Лукашэнкі на ліст, што быў перададзены празь міністра замежных справаў Беларусі спадара Хвастова 9 красавіка. Пра гэта паведаміў на сёньняшнім паседжаньні лідэраў апазыцыйных палітычных партыяў кіраўнік групы АБСЭ ў Беларусі Ганс-Георг Вік.
Амбасадар Вік сказаў, што ён пакуль ня лічыць для сябе магчымым распавядаць пра ягоны зьмест альбо нейкім чынам камэнтаваць яго. “Усе пытаньні зараз трэба задаваць дзейнаму старшыні АБСЭ”, — падкрэсьліў амбасадар.
Варта нагадаць, што ў лісьце Мірчы Джэаны выказвалася заклапочанасьць з нагоды сумнавядомага дэкрэту №8, а таксама тлумачылася пазыцыя АБСЭ ў справе падрыхтоўкі ўнутраных назіральнікаў за маючымі адбыцца сёлета ў Беларусі прэзыдэнцкімі выбарамі.
На сёньняшнім паседжаньні лідэры апазыцыйных партыяў выказалі й сваё стаўленьне да звароту "пяцёркі" патэнцыйных кандыдатаў на прэзыдэнта да жыхароў Беларусі. Усе яны ацанілі гэты крок як пэўны прагрэс.
А рада Партыі працы разглядае рашэньне аб каардынацыі дзеяньняў патэнцыйных кандыдатаў як пачатак стварэньня шырокай грамадзянскай кааліцыі. Рада вырашыла ўзмацніць падрыхтоўку ўнутраных назіральнікаў за выбарамі — сябраў партыі, а таксама правесьці шэраг пікетаў дзеля выкананьня патрабаваньняў лютаўскага прафсаюзнага мітынгу.
Станоўча ацаніў ініцыятыву “пяцёркі” і выканкам Беларускай сацыял-дэмакратычнай грамады.
