Лінкі ўнівэрсальнага доступу

БЕЛАРУСКІЯ БАНКІ ЎЖО ПРАЦУЮЦЬ НА СЯЎБУ


Ігар Карней, Менск

Эканамісты банкаўскай сфэры лічаць, што жаданьне любым коштам захаваць бачнасьць стабільнасьці прынамсі да выбараў зусім не падмацаванае эканамічна.

Тэлеграма Нацыянальнага банку не для шырокага карыстаньня і была падрыхтаваная яшчэ да традыцыйнай сэлектарнай нарады Лукашэнкі: да праблемаў зь сяўбой улады рыхтаваліся загадзя.

Але, паводле аналітыкаў, прымус усё роўна нічога добрага ня дасьць. Вось меркаваньне вядучага эканаміста па валютных апэрацыях “Белбізнэсбанку” Ўладзімера Шуста:

(Шуст: ) “Кожны месяц растуць праблемы. Зараз прыйшла тэлеграма Нацбанку: усе банкаўскія ўстановы мусяць працаваць нават у выходныя, каб забясьпечыць сяўбу і выплаты па заработнай плаце. Іншымі словамі, каб дакласьці па ланцужку, што запазычанасьцяў няма, незадаволеных не існуе.

Ідуць на розныя падманы: выдаюцца крэдыты зь неіснуючым закладам — абы каб закрыць пытаньні на кантрольную дату. Я з жахам думаю, што да выбараў ужо ніякія адміністрацыйныя меры ня здолеюць вырашыць гэтай праблемы”.

(Карэспандэнт: ) “Вы лічыце, што гэтак фінансавае пытаньне зь сяўбой ды запазычанасьцямі па заробках вырашанае быць ня можа?”

(Шуст: ) “Заўтра могуць знайсьці сродкі, вымусяць кагосьці пералічыць, загадаюць банку выдаць крэдыт. Але ёсьць такое паняцьце: пакуль не пагасілі адзін крэдыт, няможна выдаць другі. Але йдуць на такія парушэньні, знаходзяць сродкі любымі шляхамі, каб тэрмінова папярэдні крэдыт пагасіць і выдаць тут жа новы — нават ня гледзячы на тое, ці зможа прадпрыемства яго аддаць.

Тэарэтычна мэта быццам добрая, але якім чынам яна дасягаецца? На праблему кладзем яшчэ адну, праходзіць месяц — новую. Пройдзе пяць месяцаў — што тады будзе?”

З папярэдніх разьлікаў, банкі краіны, незалежна ад формы ўласнасьці, мусяць ахвяраваць на сяўбу 18 мільёнаў даляраў — гэта найперш на паліва. Відавочна, што менавіта банкам прыйдзецца выпраўляць асноўныя фінансавыя хібы, што цягам апошніх гадоў нарабіла эканамічна авантурная палітыка цяперашняга кіраўніцтва.

З банкаўскіх крыніц таксама стала вядома, што Нацыянальны банк зможа падтрымліваць курс рубля да даляра ў цяперашніх прапорцыях толькі да ліпеня. Потым трэба чакаць альбо імклівага абвалу, альбо яшчэ больш радыкальных захадаў у прыцягненьні сродкаў ад усіх суб’ектаў гаспадараньня, незалежна ад формы ўласнасьці.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG