Два дні таму, выступаючы з пасланьнем да Нацыянальнага сходу, Аляксандар Лукашэнка параіў амбасадарам, якія не прыйшлі яго паслухаць: "Няхай сядзяць у сваіх рэзыдэнцыях у чатырох кутах". Неўзабаве некаторых амбасадараў могуць пазбавіць і гэтых "кутоў".
Як нам стала вядома з дасьведчаных крыніц, блізкіх да дыпляматычных прадстаўніцтваў краінаў Эўразьвязу, нядаўна польскія дыпляматы атрымалі ліст ад Менгарвыканкаму, у якім ім прапануюць у трохмесячны тэрмін пакінуць цяперашні будынак амбасады, што на вуліцы Румянцава.
Як сьцьвярджае наша крыніца, хутка тое ж прапануюць і суседзям палякаў — нямецкім дыпляматам, чыя амбасада побач. Яшчэ летась зь немцамі вялі адпаведныя перамовы з гэтай нагоды. Адметна, што зьвяртаюцца да той жа матывацыі, што і ў колішняй гісторыі з "Драздамі" — "каналізацыйныя сыстэмы патрабуюць тэрміновага рамонту".
Што да рамонту, то, напрыклад польскія дыпляматы амаль год прасілі дазволу на тое, каб зрабіць рамонт у сваёй амбасадзе. Але гэтыя намаганьні ня мелі плёну. Магчыма, улады турбаваліся, каб у часе рамонту ня зьнішчылі "жучкоў" ды іншых прыладаў для праслухоўваньня.
Як мяркуе наша крыніца, сапраўдная прычына высяленьня — непажаданае суседзтва дыпляматаў з шэрагам гасьцявых катэджаў адміністрацыі прэзыдэнта, што месьцяцца побач. Магчыма таксама, што будынкі нямецкай ды польскай амбасадаў спатрэбіліся для пашырэньня гасьцявога пасёлку.
Цяпер польскаму прадстаўніцтву прапануюць арандаваць іншы будынак — верагодна, блізу рэстарацыі "Ракаўскі бровар".
Я зьвярнулася па тлумачэньні да намесьніка старшыні Менгарвыканкаму Вячаслава Абрамава (менавіта ягоная кампэтэнцыя — пытаньні прыватызацыі ды арэнды памяшканьняў).
(Абрамаў: ) "Я афіцыйна кажу, што Менгарвыканкам будзе супраць усіх дзеяньняў, накіраваных на тое, каб амбасаду пазбавіць плошчаў.
Гэта палітычна ня толькі дрэнны, але й неразумны крок. Прынамсі, я ня веру ў гэтыя дзеяньні", — зазначыў спадар Абрамаў, дадаўшы пры гэтым, што калі польскай амбасадзе спатрэбіцца дапамога, яна можа разьлічваць на менскія ўлады.
Я зьвярнулася таксама да прадстаўніка "Дыпсэрвісу" кіраўніцтва справаў прэзыдэнта Алега Новікава.
(Новікаў: ) "Напэўна, было б больш карэктна задаваць гэтыя пытаньні прадстаўнікам польскай амбасады. Рэч у тым, што бязь іхнай згоды мы ня можам даваць інфармацыю пра амбасаду".
Але ў амбасадзе Польшчы пакуль адмаўляюцца камэнтаваць сытуацыю з магчымым высяленьнем.
