Лінкі ўнівэрсальнага доступу

БЕЛАРУСЬ ЗАПАВОЛЬВАЕ ЭЎРААЗІЙСКУЮ ІНТЭГРАЦЫЮ


Міхал Стэльмак, Менск

Нігматжан Ісінгарын правёў перамовы зь беларускім прэм’ерам Уладзімерам Ярмошыным. Перамовы тычыліся Эўраазійскай эканамічнай супольнасьці. Гэтую арганізацыю заснавалі летась лідэры пяці дзяржаваў, што ўваходзяць у Мытны саюз.

Сёньня старшыня Інтэграцыйнага камітэту паведаміў, што зараз шпарка ідзе юрыдычнае афармленьне новай структуры:

(Ісінгарын: ) "Першае паседжаньне плянуем у Менску. Аднак тэрмін правядзеньня паседжаньня “пяцёркі” залежыць ад расейскага парлямэнту. Пакуль што невядома, калі Масква ратыфікуе Дамову аб заснаваньні Эўраазійскай эканамічнай супольнасьці. Ня выключана, што гэта будзе ўжо ў сярэдзіне году. Паводле маіх зьвестак, у красавіку гэта зробіць Кіргізія. Магчыма, ратыфікуе ў красавіку і Беларусь".

Паводле ягоных словаў, найбольш актыўна працуюць дзеля эўраазійскай эканамічнай інтэграцыі Казахстан і Таджыкістан.

На паседжаньні казаскага парлямэнту прагучала крытыка ў бок Беларусі. Спадар Ісінгарын патлумачыў нашаму радыё прычыны незадаволенасьці пазыцыяй афіцыйнага Менску:

(Ісінгарын: ) "Калі ратыфікацыя адбывалася ў парлямэнце Казахстану, я быў у сталіцы Астане. Але ў нас да Беларусі ёсьць адно пытаньне — магчыма, яно й атрымала тады водгук. Да Беларусі мы маем пытаньне наконт фінансаў", — паведаміў старшыня Інтэграцыйнага камітэту.

Падчас падпісаньня Дамовы аб Эўраазійскай эканамічнай супольнасьці, апроч прэзыдэнта Казахстану Нурсултана Назарбаева, гарачым прыхільнікам ейнага заснаваньня быў Аляксандар Лукашэнка. Новую структуру ён параўнаў з Эўрапейскім Зьвязам.

Тады ж прынялі рашэньне пра фінансаваньне створанай арганізацыі. Расеі вызначылі ўнёсак 40%, а Беларусі ды Казахстану па 20%. І вось, нягледзячы на абяцаньні Лукашэнкі ў Астане, афіцыйны Менск плаціць сваю долю не сьпяшаецца. Спроба Нігматжана Ісінгарына зрушыць гэтую праблему падчас цяперашняга візыту не ўдалася.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG