Дату прэзыдэнцкіх выбараў павінна прызначыць так званая Палата прадстаўнікоў. Ейная чарговая сэсія распачнецца 2 красавіка, калі ня будзе скліканая пазачарговая сэсія. Цэнтральнай камісіі патрэбна як найменш тры месяцы на падрыхтоўку й правядзеньне выбараў прэзыдэнта.
Гаворыць Лідзія Ярмошына:
(Ярмошына: ) "Калі парлямэнт 2 красавіка зьбярэцца на сваю сэсію, на чэрвень ён прызначыць выбараў ніяк ня зможа. Таму што скарочаныя тэрміны правядзеньня выбараў магчымыя толькі пры датэрміновых выбарах, калі пасада прэзыдэнта зрабілася вакантнай, прыклад — выбары Пуціна".
Такім чынам, паводле словаў Лідзіі Ярмошынай, выбары могуць прызначыць на час паміж 2 ліпеня й 27 верасьня.
Соймавая канфэрэнцыя КХП БНФ нядаўна зьвярнулася да свайго лідэра Зянона Пазьняка з заклікам узяць удзел у прэзыдэнцкіх выбарах.
Са словаў спадарыні Ярмошынай, Зянон Пазьняк ня можа быць зарэгістраваны як кандыдат, хаця афіцыйны камэнтар па гэтай справе можа даць толькі ЦВК у поўным складзе пасьля вывучэньня ўсіх матэрыялаў.
(Ярмошына: ) "Калі казаць пра тэарэтычны падыход, то Пазьняк ня можа быць зарэгістраваны, бо апошнія дзесяць гадоў не жыве на тэрыторыі Рэспублікі Беларусі".
Што да іншага прэтэндэнта — Міхаіла Чыгіра, дык нягледзячы на перасьлед яго праваахоўчымі органамі, магчымасьць рэгістрацыі застаецца, пакуль прысуд да яго не ўступіў у законную сілу.
Цяпер, як зазначыла Лідзія Ярмошына, Цэнтарвыбаркам рыхтуецца да выбараў. У прыватнасьці, складаюць праекты каштарысаў. У гэтых праектах ЦВК зыходзіць з прагнозу, што ў выбарах возьмуць удзел да 15 кандыдатаў.
