Лінкі ўнівэрсальнага доступу

Навіны 17 кастрычнiка 2000 г.


Ганна Соусь, Менск

Вядома, што ў акругах, дзе балятаваліся лідэры трох апазыцыйных партыяў — Мікола Статкевіч, Сяргей Гайдукевіч і Сяргей Калякін — выбары не адбыліся. Чаго дамагліся гэтыя кандыдаты ў дэпутаты, беручы удзел ў выбарах у Палату Прадстаўнікоў? Якім чынам яны выкарыстаюць свой "выбарчы" досьвед пад час будучых прэзыдэнцкіх выбараў?

Старшыня Беларускае Сацыял-Дэмакратычнае партыі "Народная Грамада" Мікола Статкевіч лічыць плённым свой удзел у выбарах, па-першае таму, што ён меў магчымасьць адкрыта сустракацца зь людзьмі…

(Статкевіч: ) "Вырасьлі колькасна арганізацыі партыі. Сем новых арганізацыяў партыі ўтворана ў райцэнтрах за час выбарчай кампаніі. Я думаю, што на гэтых выбарах адпрацоўваліся тэхналёгіі перамогі на прэзыдэнцкіх выбарах. Гэтая тэхналёгія намі ўжо на сабе выпрацаваная, мы ведаем яе. Сутнасьць яе ў спалучэньні сучасных піяраўскіх тэхналёгіяў і тыповых савецкіх мэтадах прымусу. Відавочна, што ўсё гэта будзе паўторана на прэзыдэнцкіх выбарах, і мы павінны быць да гэтага падрыхтаваныя".

Зазначыў Мікола Статкевіч. Ён дагэтуль мяркуе, што байкатаваньне выбараў было памылкаю.

(Статкевіч: ) "Мы зрабілі першы крок да паразы на прэзыдэнцкіх выбарах паўтары гады таму, калі мы адмовіліся ад удзелу ў мясцовых выбарах, а гэта значыць, што мы адмовіліся ад магчымасьці ўплываць на фармаваньне выбарчых камісіяў. Зараз мы зрабілі , мабыць, другіх паўкрока да паразы на прэзыдэнцкіх выбарах, таму што сьведама частка апазыцыі адмовілася ад падрыхтоўкі камандаў на прэзыдэнцкія выбары, ад іх трэніроўкі і выпрацоўкі тэхналёгіяў, і, самае галоўнае, ад магчымасьці хаця б шанцу ўплываць на выбарчае заканадаўства на прэзыдэнцкіх выбарах",

— кажа Мікола Статкевіч.

Лідэр Лібэральна-Дэмакратычнае партыі Беларусі Сяргей Гайдукевіч таксама выказаў задаволенасьць вынікамі выбараў:

(Гайдукевіч: ) "Мы цэлы тыдзень перадавалі БДІЧ дакумэнты, у якіх былі зафіксаваныя фальшаваньні пад час выбараў. І мы ганарымся тым, што пры нашым дзейсным удзеле Эўропа не прызнала выбары. У сяброў партыі цяпер цудоўны настрой. Праведзены маніторынг у вясковых акругах, цяпер мяне там ведаюць.

Што тычыцца будучых прэзыдэнцкіх выбараў, дык безумоўна, апазыцыя пойдзе на іх адзінай сілаю. І гэта неабавязкова будзе адзіны кандадат у прэзыдэнты. Выпрацоўваецца пэўная тактыка.

Я мяркую, што мы вельмі добра падрыхтаваліся да прэзыдэнцкіх выбараў. Цяпер мы ведаем рэальны рэйтынг Лукашэнкі, ён вельмі нізкі", — мяркуе Сяргей Гайдукевіч.

Выбары не адбыліся і ў акрузе, дзе балятаваўся лідэр Партыі камуністаў Беларускай Сяргей Калякін. Тым ня менш спадар Калякін таксама задаволены вынікам выбараў. На ягоную думку, 14 адсоткаў галасоў, якія атрымалі кандыдаты ад ягонае партыі, — гэта зусім нядрэнна:

(Калякін: ) "Я мяркую, што гэта не канец, а толькі пачатак. Цяпер мы ўступаем у вельмі важны пэрыяд падрыхтоўкі да прэзыдэнцкіх выбараў, і ўсё толькі пачынаецца.

На маю думку, мой асабісты вынік — другое месца ў акрузе — гэта даволі добра, калі ўлічваць той прамоўшэн у мой адрас на працягу тыдня з удзелам прэзыдэнта ва ўсіх дзяржаўных сродках масавай інфармаціі", — зазначыў Сяргей Калякін.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG