Лінкі ўнівэрсальнага доступу

Навіны 22 верасьня 2000 г.


Казімер Яноўскі, Гомель

(эфір 21 верасьня)
А 17 гадзінаў 10 хвілінаў у прыватны дом кіраўніка Гомельскага абласнога грамадзкага аб'яднаньня «Грамадзянскія ініцыятывы» Віктара Карніенкі падманным шляхам праніклі шасьцёра невядомых (двое — у міліцэйскай форме)…

Каб патрапіць у дом да кіраўніка «Грамадзянскіх ініцыятываў», адзін зь невядомых сказаў у дамафон, што "гэта з газэты «Рэспубліка»". Знаёмыя спадара Карніенкі адчынілі дзьверы. Але замест карэспандэнтаў у дом зьявіліся двое ў міліцэйскай форме ды яшчэ чацьвёра ў цывільным. Адзін зь міліцыянтаў паказаў пасьведчане на ймя Мікалая Раманава, палкоўніка абласное міліцэйскае ўправы…

Як разьвіваліся падзеі далей, распавядае сам Віктар Карніенка:

"Я запытаў — чаму вы прыйшлі ў мой дом? Што вам трэба? Яны адказалі спачатку, што трэба газэта «Рэспубліка». Пасьля адзін у цывільным паправіў: не «Рэспубліка», а ўсё ж такі «Рабочы». Пытаньне зьвялося да аднаго: «Ці ёсьць у вас у доме такая газэта?» Я паўтарыў: «У чым справа? Што вы ад мяне хочаце?» Палкоўнік сказаў, што ён хацеў задаць пытаньне. Пасьля 5-7 хвілінаў такое размовы яны зразумелі, што перавысілі свае паўнамоцтвы й сыйшлі. Але я лічу, што гэта падстава для звароту да пракурора Гомельскае вобласьці, бо такім чынам у Беларусі парушаецца заканадаўства й робіцца ўціск на мяне як грамадзяніна".

На думку спадар Карніенкі, хутчэй за ўсё міліцыянты зь невядомымі асобамі шукалі, хто прывёз у горад адмысловы выпуск газэты «Рабочы» з заклікам да байкоту выбараў. Але гэта толькі здагадка.

Сёньня ж спадар Карніенка напісаў заяву на ймя пракурора вобласьці Алега Палавінкі ў прыцягненьні да адказнасьці палкоўніка Раманава й пяці ягоных спадарожнікаў, якія перавысілі свае службовыя паўнамоцтвы і шляхам падману ўвайшлі ў прыватны дом, чым парушылі гарантаваную Канстытуцыяй недатыкальнасьць жытла.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG