Навіны 22 лютага 2000 г.

На пачатку артыкулу "International Herald Tribune" згадваецца факт аб тым, што нядаўна галоўны рэдактар расейскай газэты "Сегодня" Міхаіл Бэргэр звярнуўся да выкапаўцы абавязкаў прэзыдэнта Расеі Ўладзімера Пуціна з просьбай даць інтэрвію ягонай газэце. Адказ Крамля на гэтую просьбу быў даволі нечаканы: "Ніколі, ніколі не будзе інтэрвію для гэтай газэты", - заявіў прэсавы сакратар Пуціна, - для кагосьці іншага так, але не для вас".

На думку аўтаркі артыкулу ў "International Herald Tribune" Шарон Лафраньер, падобны адказ сымбалізуе сабой новы — больш жорсткі — падыход Крамля да сродкаў масавай інфармацыі. Яна цытуе словы Рафа Шакірава, былога галоўнага рэдактара газэты "Камэрсант":"Абсалютна ясна, што для сродкаў масавай інфармацыі пачынаецца новая эпоха". Пад пагрозай знаходзіцца адна з галоўных заваёваў расейскай дэмакратыі – свабода прэсы.

Незалежныя сродкі масавай інфармацыі вельмі слабыя, а часам па-за Масквой іх няма зусім. І ім даводзіцца часам супроцьстаяць фінансаваным з бюджэту дзяржаўным сродкам масавай інфармацыі. Дзякуючы былому прэзыдэнту Барысу Ельцыну на працягу мінулых дзесяці гадоў ніводзін расейскі палітык не адважваўся пагражаць ім.

І вось цяпер, адзначаецца ў камэнтары "International Herald Tribune", пасля прызначэньня Ўладзімера Пуціна спачатку прэм'ерам, а цяпер выканаўцам абавязкаў прэзыдэнта – Крэмль пачаў выразна маніпуляваць інфармацыйнымі плынямі. Дзяржаўныя тэлевізыйныя каналы праводзілі прапагандысцкую кампанію супроць палітычных апанэнтаў Крамля падчас перадвыбарчай парляманцкай кампаніі ў сьнежні мінулага году. Яны рашуча адкідаюць такую інфармацыю пра чачэнскі канфлікт, якая прывяла да ліквідацыі народнай падтрымкі для арміі падчас мінулай чачэнскай вайны.

Расейскія ўлады абмяжоўваюць доступ незалежным журналістам у Чачню. Найбольш выразны прыклад падобнага падыходу, піша "International Herald Tribune", справа Андрэя Бабіцкага. У адкрытым лісьце ўладам галоўныя рэдактары 32 расейскіх незалежных газэтаў выказалі свой пратэст супроць адносінаў да Бабіцкага.

Алег Панфілаў, былы экспэрт фонду Абароны галоснасьці лічыць: "Такая агрэсыўная атака на незалежныя сродкі масавай інфармацыі ніколі не магла здарыцца ў перыяд прэзыдэнцтва Ельцына. Гэта пачатак трагічнай эпохі ў гісторыі расейскай прэсы".

У сваім нядаўнім амаль гадзінным інтэрвію тэлевізыйнаму каналу ОРТ Уладзімер Пуцін заявіў, што свабодная прэса – найлепшая абарона Расеі ад таталітарызму. "Гэта маё глыбокае перакананьне", – падкрэсліў ён. Факты, аднак, сьведчаць пра зусім іншае, падкрэсліваецца ў артыкуле "International Herald Tribune".

Найбольш уплывовы незалежны телевізыйны канал НТВ, перадачы якога прыймаюць на тэрыторыі амаль паловы краіны, і інфармацыя якога пра чачэнскую вайну прызнаецца нават замежнымі экспертамі ў якасьці аб'ектыўнай, нядаўна атрымаў ліст ад кіраўніцтва напаўдзяржаўнага гіганцкага газавага манапаліста ГАЗПРОМ у справе зьместу сваіх перадачаў. Нагадаем, што Газпрому належыць 30% акцыяў НТВ. У лісьце гэтым гаворыцца, што Газпром можа перагледзець палітыку сваіх капіталаўкладаньняў у НТВ у сувязі зь не зусім патрыятычным падыходам телестанцыі да асьвятленьня чачэнскай вайны.