(эфір 10 лютага)
Ад сёньня сьпіртовыя напоі ў Беларусі падаражэлі на 20 адсоткаў. Бутэлька гарэлкі цяпер каштуе блізу 1000 новых рублёў. Прычым, афіцыйных паведамленьняў пра падвышэньне цэнаў не было. Сёньня супрацоўнікі крамаў перапісвалі цэтлікі з цэнамі. Гарэлка "Крышталь-люкс" – 950 рублёў за бутэльку замест ранейшых 780-ці, "Белая Русь" каштуе цяпер таксама 950, а была – 700 рублёў. Ажыятажу няма. Чэргі стаялі толькі ў спэцыялізаваных крамах… Крама "Крышталь-100" па вуліцы Варвашэні. Адчыняю дзьверы й аўтаматычна станаўлюся апошнім адразу ў дзьвюх чэргах. Адлегласьць да паліцаў у 15 мэтраў пераадольваю прыкладна за паўгадзіны. Паўсюль ужо цэтлікі з новымі цэнамі. Не зважаючы на гэта, менш за тры бутэлькі ніхто не бярэ. У іншай краме, "Два буслы", атмасфэра не такая напружаная. Чарга тут складаецца прыкладна з 20 чалавек. Але бальшыня зь іх набывае сьпіртовыя напоі скрынямі, якія адразу ж загружаюць у багажнікі легкавых машын ды мініаўтобусаў. Бальшыня адрэагавала на павышэньне цэнаў спакойна: (голас: ) "Ну, вядома, непрыемна. Пэнсію дабаўляюць чуць-чуць, а гарэлка, як кажуць, ледзь ня ў два разы падскоквае. Каму премна?" (Карэспандэнт: ) "Як вы ставіцеся да таго, што сёньня падаражэла гарэлка?" (іншы голас: ) "Нармальна". (жанчына: ) "Я не зьвярнула ўвагі". (іншы голас: ) "Кепска". (іншы голас: ) "На ўсё па-мойму кошты растуць". (іншы голас: ) "Калі я адзін раз у год куплю бутэльку, дык мне ўсё роўна. Галоўнае – прадукты даражэюць кожны дзень". (іншы голас: ) "А мне ўсё роўна. Калі мне трэба – я вазьму. Калі сябры прыходзяць, я ж мушу паставіць". (іншы голас: ) "Гарэлка ёсьць гарэлка, што ж зробіш. Я гарэлку ня вельмі ўжываю зараз. Таму мяне гэтпая праблема ня вельмі хвалюе". Беларуская гарэлка – самая танная ў Эўропе. Для параўнаньня: паўлітровая пляшка ў суседняй Летуве каштуе больш за 5 амэрыканскіх даляраў. Але для жыхароў Беларусі адносна танная гарэлка становіцца дарагім задавальненьнем. Мінімальны заробак складае сёньня 1400 дэнамінаваных рублёў. На гэтыя грошы можна набыць толькі адную бутэльку. (голас: ) "Вось не магу купіць. Хацела купіць, а яна падаражэла. І ня буду браць". (голас: ) "Аклады, пэнсіі маленькія. А сьвята хочацца адзначыць". (Карэспандэнт: ) "Колькі вы можаце дазволіць сабе набываць гарэлкі?" (голас: ) "Ну дзесяць штук". (Карэспандэнт: ) "Колькі вы можаце ўвогуле дазволіць сабе набываць гарэлкі?" (голас: ) "Ня столькі, колькі раней. Значна менш". (голас: ) "Занадта дорага, не па кішэні. Я купляю яе рэдка. Чарніла дзешавей".
Цэны па сьпіртовыя напоі падвышаюцца няспынна. Да прыкладу, толькі летась гэта адбылося восем разоў. У выніку пэўная колькасьць насельніцтва замест гэтак званых "белых" гатункаў пачала ўжываць розныя каляровыя сурагаты пад назвамі "Загадка", "Легенда" або "Крыжачок". Але гэтым разам цэны падвысіліся на ўсе гатункі сьпіртовых напояў.