Навіны 31 студзеня 2000 г.

На кірмашы "Паўднёвы" ёсьць прафсаюз. Там людзі згуртаваныя. Ва ўсякім разе большасьць. Таму акцыі пратэсту там адбываюцца арганізавана. Хаця ў апошнія разы, пад час кароткатэрміновых страйкаў, частка прадпрымальнікаў выходзіла на працу. Гандлявалі каля сотні палатак. Усяго ж на кірмашы 2000 прадпрымальнікаў.

Цяперашні страйк разьлічаны на месяц. Таму для штрэйкбрэхераў іншага выйсьця, апоч як далучыцца да астатніх, ня будзе, бо гараджане перастаюць езьдзіць на кірмаш. Мноства аўтобусаў і маршрутных таксі, якія зьвязваюць родныя раёны гораду з кірмашом, які знаходзіцца на ўскраіне, таксама ў дні страйку не працуюць.

Крыху іншая сытуацыя на рынку "Цэнтральны", які знаходзіцца ў горадзе. Пад час апошніх аднадзённых страйкаў палова прадпрымальнікаў, якія гандлююць крамнінай, не падтрымалі калегаў з Паўднёвага.

У нядзелю я размаўляў з прадпрымальнікамі "Цэнтральнага" рынку. Яны настроеныя менш рашуча. Частка лічыць, што трэба страйкаваць абавязкова. Іншыя ўжо ні на што не спадзяюцца. Адзін зь іх сказаў мне, што быццам бы людзі з "Паўднёвага" выкупілі частку месцаў на "Цэнтральным" кірмашы, каб паціху гандляваць, калі іхны кірмаш будзе стаяць.

Намесьнік старшыні прафсаюзу "Паўднёвага" Аляксандар Васілеў, аднак, перакананы, што прадпрымальнікі актыўна падтрымаюць страйк, а калі ўлады не задаволяць іхных падрабаваньняў, дык ня выключана, што ў Горадні могуць адбыцца мітынг або дэманстрацыя, нават, без дазволу ўладаў.

Больш як палова прадпрымальнікаў мае вышэйшую адукацыю. Раней яны працавалі інжынэрамі, лекарамі, настаўнікамі, кіравалі цэхамі, нават – прадпрыемствамі і арганізацыямі. Гэта – актыўныя людзі, якія хочуць чагосьці дасягнуць. Сама прырода бізнэсу падштурхоўвае іх да актыўнасьці і самастойнасьці дзеяньняў. Так лічыць прафсаюзны кіраўнік Аляксандар Васілеў.