Лінкі ўнівэрсальнага доступу

Сёньня


Ад нядаўняй пары самым ходкім таварам на наваполацкім рынку стаўся хлеб расейскай выпечкі, які штодня завозіцца з Неўля і Вялікіх Лукаў. Рэпартаж з Наваполацку пра экспансію расейскіх тавараў.

Дзівіцца з прычыны ажыятажнага попыту на расейскі хлеб не даводзіцца – ён добрай якасьці і каштуе таньней за наваполацкі. Яшчэ пяць гадоў таму вуліцы нашых гарадоў поўнілі аўтобусы з братняй Пскоўшчыны – браты ехалі да нас па харчы. Цяпер жа, як бачым, назіраецца адваротны працэс, і ўжо расейцы вязуць да нас спажыву.

З паліцаў наваполацкіх крамаў раз за разам зьнікаюць айчынныя тавары, і іх месца ўпэўнена займае расейскі імпарт, у прыватнасьці, мяса-малочныя прадукты. Пры гэтым літар завезенага з Расеі малака каштуе ў Наваполацку 870 рублёў, а ў Маскве ў пераліку на беларускія рублі – усяго толькі 360. Падобная цэнавая дыспрапорцыя тычыцца і іншых тавараў.

Экспансія расейскіх тавараў на наш рынак адбываецца як з прычыны бядотнага стану аграрнага комплексу, так і стаўленьня ўраду да айчыных вытворцаў. Шырокай грамадзкасьці Полаччыны сталі вядомыя лічбы, якія характарызуюць дынаміку заняпаду мясцовай мяса-малочнай галіны. Так, у параўнаньні з 1990 годам вытворчасьць масла на Полацкім малочным заводзе скарацілася ў 9 разоў. Пры вытворчых магутнасьцяў у 600 тон, на заводзе сёньня перапрацоўваюць у содні каля 60 тонаў малака, і каб нечым заняць рабочых, адміністрацыя вымушаная задзейнічаць лініі па разьліве мінэральнай вады і ліманаду ды іншых безалкагольных напояў. Прычына такога стану рэчаў ізноў такі відавочная – недахоп сыравіны.

Падобная праблема апанавала і Полацкі мясакамбінат. Прадпрыемства ня ў стане своечасова разьлічвацца за здадзеную жывёлу, і таму вымушанае прадукаваць не каўбасу, а розныя сурагаты. У такой сытуацыі ўлады забаранілі калгасам здаваць жывёлу на недзяржаўныя прадпрыемствы, але гэтыя захады не далі плёну, калі не лічыць, што сумеснае беларукска-аўстрыйскае прадпрыемства па вытворчасьці каўбасаў, што дзейнічае ў Полацкім раёне, вымушанае згортваць вытворчасьць.

Заўважым, што наваполацкія крамы апанаваў ня толькі мяса-малочны імпарт, але і тавары, якія апошнім часам да нас практычна не завозіліся. Гэта торты, печава, кексы, пернікі, цукеркі.

Вінцэсь Мудроў, Наваполацак

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG