Гомельскі абласны суд пастанавіў ліквідаваць моладзевы
культурна-асьветны цэнтар "Яравіт". Гэта другая грамадзкая суполка, што
ліквідуецца праз суд на гэтым тыдні.
Прычына ліквідацыі культурна-асьветнага цэнтру "Яравіт" такая самая,
што й у "Абяздоленых бальшавізмам". Фармальна цэнтар не прайшоў перарэгістрацыі
паводле дэкрэту Лукашэнкі. Ініцыявала ліквідацыю ізноў Управа юстыцыі аблвыканкаму.
Пазоў у суд падпісаў ейны начальнік Валянцін Макарэвіч. Менавіта ён 1,5
года таму адмовіў культурна-асьветнаму цэнтру ў рэгістрацыі — не спадабалася
назва "Яравіт".
Спаслаўшыся на Савецкі энцыкляпэдычны слоўнік выданьня 1983 году Ўправа
паведаміла тады кіраўніку цэнтру Яўгену Касьцюшку, што "Яравіт" у балцкіх славян
— бог вайны, таму назоў не супадае з мэтамі і задачамі культурна-асьветнай
дзейнасьці.
Пры гэтым чыноўнікі не дачыталі тлумачэньня, дзе напісана, што Яравіт
зьвязаны і з культам веснавой урадлівасьці. Тут ужо ёсьць сувязь з асьветнай
дзейнасьцю. Дарэчы, такой дзейнасьцю цэнтар "Яравіт" і займаўся. Зусім
нядаўна, на падставе матэрыялаў наладжаных навуковых канфэрэнцыяў, сябры
цэнтру "Яравіт" падрыхтавалі й выдалі зборнік "Традыцыі беларускай дзяржаўнасьці".
Што для "Яравіта" рашэньне суду ліквідаваць цэнтар? Распавядае Яўген
Касьцюшка:
(Касьцюшка: ) "Страчваецца рэальнае поле для фармальнай дзейнасьці.
А праца так ці інакш будзе працягвацца".
Дадам, што пасьля сумнавядомай перарэгістрацыі Гомельшчына страціла
цэлую сотню грамадзкіх фармаваньняў.
Казімер Яноўскі, Гомель
Самае папулярнае
1