Сёньня

Нагодай дзеля страйкавай акцыі сталася апісаньне тавараў шэрагу дробных прадпрымальнікаў, распачатае работнікамі Камітэту фінансавых расьсьледаваньняў. Апісаньні пачаліся 23 сьнежня, і на пытаньні чаўнакоў: "Дзеля чаго гэта робіцца?", адказ быў надзвычай ляканічны: "На ўсялякі выпадак".

Як правільна зразумелі прадпрымальнікі, падобныя дзеяньні — гэта ня што іншае, як першы этап масавых канфіскацыяў і грашовых спагнаньняў у сьвятле кагадзе ўведзенага мытнага афармленьня тавараў.

Таго ж дня старшыня мясцовага Прафсаюзу дробных прадпрымальнікаў Валер Шаўчэнка наведаў згаданы Камітэт і запатрабаваў тлумачэньняў — на якіх падставах пачаліся апісаньні тавараў, калі справа аб мытным афармленьні знаходзіцца яшчэ на разглядзе ў Савеце міністраў, але ўцямных тлумачэньняў не дачакаўся. Між тым, з прыватных размоваў уведаў, што напярэдадні кіраўнікоў рэгіянальных аддзелаў Камітэту фінансавых расьсьледаваньняў выклікалі ў Савет бясьпекі і запатрабавалі любым чынам выбіць грошы з прадпрымальнікаў, каб запоўніць пусты бюджэт.

У такой сытуацыі наваполацкія чаўнакі, заўважым, людзі ў асноўным з вышэйшай і сярэдняй спэцыяльнай адукацыяй, правялі два агульных сходы і адзінагалосна вырашылі: 1 студзеня распачаць страйк. Пры гэтым яны адкінулі прапанову калегаў зь іншага рэгіёну страйкаваць першых пяць дзён студзеня, бо гэта, на іхную думку, ня дасьць аніякага плёну, і вырашылі не выходзіць на працу да 16 студзеня.

Патрабаваньне, якое яны вылучылі, складаецца з аднаго сказу: "Спыніць апісаньне тавараў". Калі гэтае патрабаваньне ня будзе задаволенае, наваполацкія чаўнакі мерацца працягнуць страйк да канца студзеня.

Вінцэсь Мудроў, Наваполацк