Ізноў спынілі працу больш за 200 прыватных гандляроў
Салігорску. Яны абвясьцілі бестэрміновы страйк.
Сёньня жыхары Салігорску, завітаўшы раніцай на рэчавы рынак "Старавакзальны",
былі расчараваныя — гандлю не было.
Прадстаўнікі салігорскага Незалежнага прафсаюзу прадпрымальнікаў тлумачылі
людзям, чаму гандляры распачалі страйк — прыватных гандляроў кіраўніцтва
краіны літаральна вынішчае як клясу.
Старшыня прафсаюзу спадар Цацура аргумэнтаваў страйк тым, што не зважаючы
на агульнабеларускі страйк прадпрымальнікаў у студзені, дагэтуль не
скасавалі пастановы Дзяржаўнага мытнага камітэту № 55 пра новы парадак
мытнага афармленьня тавараў трэціх краінаў, якія камэрсанты ўвозяць з Расеі.
Не спынілі бясконцых праверак прадпрымальнікаў і мясцовыя кантрольна-рэвізійныя
органы. Гандляры па-ранейшаму плоцяць неабгрунтаваныя штрафы.
Прычынай страйку называлі й тое, што гарадзкія ўлады цягам апошняга
году павялічылі арэндную плату за адно гандлёвае месца больш чым на 520%.
Страйк салігорскіх прадпрымальнікаў, паводле словаў іхнага лідэра, —
бестэрміновы. Доўжыцца будзе, пакуль гэтых праблемаў ня вырашыць урад і
тутэйшая "вэртыкаль".
Сёньня ж выканаўчае бюро Незалежнага прафсаюзу прадпрымальнікаў Салігорску
накіравала свае патрабаваньні ў дзяржаўныя ўстановы і ў адміністрацыю Лукашэнкі.
Алесь Мікалайчанка, Салігорск
Самае папулярнае
1