Сёньня амбасадар Беларусі ў Літве Ўладзімер Гаркун даў прэсавую канфэрэнцыю
ў Вільні, на якой выклаў афіцыйную пазыцыю Менску адносна вынікаў першага
туру выбараў у Беларусі. Сёньня ж з афіцыйнай заявай выступіў прызначаны
Вярхоўным Саветам 13-га скліканьня генэральны пракурор Беларусі Рыгор Пракаповіч.
Уладзімер Гаркун падрабязна спыніўся на статыстычных дадзеных першага
туру выбараў. Гэтыя лічбы цалкам адпавядаюць інфармацыі Цэнтарвыбаркаму.
Не былі арыгінальнымі і ацэнкі саміх выбараў.
Пасол заявіў, што беларускі народ сваім актыўным удзелам у іх выразіў
сваю падтрымку ўладзе на чале з сёньняшнім прэзыдэнтам. Кампанія байкоту,
абвешчаная апазыцыяй, пацярпела крах. За выбарамі сачылі шматлікія назіральнікі,
якія ў цэлым станоўча ацанілі кампанію.
Негатыўныя ацэнкі некаторых зь іх, у тым ліку і Бюро праблемаў дэмакратыі
і правоў чалавека былі заведама перадузятыя і таму неаб”ектыўныя. На пытаньне,
чаму праблема прызнаньня выбараў дэмакратычнымі расцэньваецца ўладамі Беларусі
як актуальная, Уладзімір Гаркун адказаў, што гэта дыктуецца падвойнымі
стандартамі, зь якімі падыходзіць Захад да Беларусі.
Сацыяльна-эканамічная сфэра Беларусі, паводле словаў амбасадара, не
паддаецца на ціск МВФ і ня йдзе на масавыя звальненьні рабочых. А ў замежнапалітычнай
ідзе на саюз з Расеяй, што Захаду, маўляў, не падабаецца. Таму працэдура
выбараў, цалкам прымальная ў краінах Эўропы, чамусьці ставіцца пад сумнеў
што да Беларусі.
Сёньня ж сваю заяву прызнаў і прызначаны апазыцыйным Вярхоўным Саветам
Беларусі 13-га скліканьня генэральны пракурор Рэспублікі Беларусь Рыгор
Пракаповіч:
(Пракаповіч: ) “Прыступіўшы да выкананьня сваіх службовых абавязкаў,
празь некаторы час, няўхільна выконваючы патрабаваньні Канстытуцыі Рэспублікі
Беларусь 1994 году, а таксама, адпаведнасьці з нормамі Крымінальна-працэсуальнага
закону, я, у якасьці генэральнага пракурора 1-га сьнежня 1999 году ініцыяваў
першую, і, магчыма, самую галоўную, крымінальную справу. Яна ўзбуджаная
паводле артыкулу 61.1 ч. 2 Крымінальнага кодэксу Рэспублікі Беларусь. Гэты
артыкул прадугледжвае адказнасьць за захоп дзяржаўнай улады ў Беларусі
неканстытуцыйным шляхам. Справа ўзбуджаная па факце, і папярэдняе сьледзтва
праводзіцца ў дачыненьні да прадстаўнікоў усіх трох былых галінаў улады,
якія нават і цяпер падпарадкоўваюцца былому прэзыдэнту. А на сёньняшні
момант ужо проста грамадзяніну Аляксандру Лукашэнку”.
(Карэспандэнт: ) “На пытаньне, як зь юрыдычнага гледзішча ён ацэньвае
выбары ў Нацыянальны сход Беларусі, Рыгор Пракаповіч адказаў:”
(Пракаповіч: ) “Адно зноў магу пацьвердзіць – гэта справа абавязкова
будзе мець судовую пэрспэктыву, а вінаватыя – пакараныя”.
Ёнас Лаўрынавічус, Вільня
Самае папулярнае
1