Прадстаўнікі партыяў, што ўваходзяць у Каардынацыйную Раду Дэмакратычных
Сілаў аб’яднанае апазыцыі знаходзяцца ў Заходняй Эўропе. Мэта паездкі –
данесьці да асноўных эўрапэйскіх інстытуцыяў інфармацыю пра вынікі “Байкоту-2000”
і пэрспэктывы прэзыдэнцкіх выбараў у Беларусі ў 2001 г.
Як паведаміў нам адзін з сяброў групы, кіраўнік БНФ “Адраджэньне” Вінцук
Вячорка, удзельнікі паездкі хочуць пабачыць салідарную пазыцыю ўсіх заходніх
краінаў у справе ацэнкі вынікаў байкоту і непрызнаньня саміх выбараў.
Сябры групы спадзяюцца атрымаць палітычную падтрымку пэрспэктываў Беларусі
ў пераходзе да дэмакратыі і захаваньня незалежнасьці.
У папярэднія дні група мела сустрэчы з прадстаўнікамі: у Парыжы – міністэрства
замежных справаў Францыі, у Бэрліне – з сябрамі Бундэстагу і дзяржаўным
міністрам, у Брусэлі – з эўрапэйскім камісарам у міжнародных справах Крысам
Паттэнам. Гаворыць Вінцук Вячорка:
(Вячорка: ) “Адразу зазначу, што ва ўсіх сустрэчах мы пачыналі размову
са сьведчаньня пра брутальны разгон маладзёвай пратэстацыйнай акцыі ў Менску
12 лістапада і ўсюды атрымлівалі поўнае разуменьне і станоўчы адказ на
нашую просьбу вельмі востра і жорстка рэагаваць на гэтыя спробы распачаць
новую хвалю рэпрэсіяў.
З Крысам Паттэнам была вельмі важная сустрэча. Мы атрымалі пацьверджаньне
таго, што Палата Прадстаўнікоў ня будзе прызнаная, як створаная ў выніку
заведама недэмакратычных выбараў. Ну, і істотным матывам у нашых размовах
былі паралелі паміж Сэрбіяй і Беларусьсю.
Потым была сустрэча ў міністэрстве замежных справаў зь Дзяржаўным міністрам
Крыстафам Цёппелем, у часе якой ён сказаў, што падтрымка Расеяй антыдэмакратычнага
рэжыму ў Беларусі супярэчыць дэмакратычнай пэрспэктыве самой Расеі.
Усе нашыя суразмоўцы вельмі цешыліся з таго, што ў Беларусі дзейнічае
рэальны цэнтр Аб’яднанай апазыцыі і заклікалі нас захоўваць гэтае адзінства
ў стратэгіі і тактыцы”.
(Сокалаў-Воюш: ) “Ці вашая група выглядае як менавіта аб’яднаная апазыцыя?”
(Вячорка: ) “Нашая група і ёсьць аб’яднаная апазыцыя. Мы выступаем як
адна скансалідаваная каманда, якая ўжо зьдзейсьніла палітычную перамогу,
пасьпяхова правёўшы кампанію “Байкот-2000” і тым адабраўшы ў рэжыму Лукашэнкі
ўпэўненасьць у ягоным заўтрашнім дні.
Мы маем дакладна прапісаную стратэгію на 2001 год, якая завязваецца
вакол вылучэньня адзінага кандыдата ад дэмакратычных сілаў.
Цэнтар прыняцьця гэтых палітычных рашэньняў – Каардынацыйная Рада дэмакратычных
сілаў”.
(Сокалаў-Воюш: ) “І, нарэшце, што адбылося сёньня?”
(Вячорка: ) “Мы прыбылі ў Страсбург. Зараз мы маем сустрэчу з дэпутатамі
Эўрапэйскага Парлямэнту Янам Віерсмам, Леннартам Сэкрэдэўсам, Элізабэт
Шроттар і шэрагам іншых эўрапарлямэнтароў. Сёньня ж маем дзьве сустрэчы
ў Эўрапарлямэнце і сёньня ж адбываем у Лёндан”.
Гутарыў
Сяржук Сокалаў-Воюш
Сяржук Сокалаў-Воюш