Старшыня БНФ Зянон Пазьняк накіраваў кіраўніку кансультацыйна-назіральнае
групы АБСЭ ў Менску Гансу Георгу Віку афіцыйны ліст, у якім вытлумачыў
прычыны выхаду сваёй партыі з перамоўнага працэсу. Пасол Вік пракамэнтаваў
зварот спадара Пазьняка.
У лісьце спадара Пазьняка ў прыватнасьці гаворыцца:
“…Пасьля поўнага і адкрытага ігнараваньня з боку выканаўчай улады ўсіх
нашых прапановаў і агульнапрынятых дэмакратычных патрабаваньняў, пасьля
прыняцьця недэмакратычнага закону пра выбары, пасьля дэманстрацыі нежаданьня
весьці перамовы з палітычнымі партыямі, сытуацыя перамянілася. 25 Сакавіка,
на Дзень Незалежнасьці, улады арганізавалі ў Менску варварскую вайсковую
апэрацыю супраць апазыцыйна настроенага народу. У час гэтай апэрацыі была
зроблена спроба забойства спадара Юрыя Беленькага сілавымі функцыянэрамі
рэжыму.
Далейшае ўдаваньне выгляду, што палітычныя партыі ўдзельнічаюць у быццам
бы перамоўным працэсе, ператвараецца ў фарс, і спрыяньне аўтарытарнай і
недэмакратычнай палітыцы існуючай улады, уцягвае палітычныя партыі ў недэмакратычныя
выбары фальшывага парлямэнту.
Наступны пошук кантакту з выканаўчай уладай магчымы толькі пасьля выразных
ацэнак дзеяньняў гэтай улады з боку палітычных партыяў.
Першай умовай павінна было стаць патрабаваньне аб узбуджэньні крымінальнай
справы супраць Міністэрства Ўнутраных Справаў па факце спробы забойства
Юрыя Беленькага ў Дзень Незалежнасьці 25 Сакавіка.
Улады ня хочуць узбуджаць справу і сьледзства па факце нападу. Гэта
– пляваньне нам у твар.
Ня можа наша партыя БНФ і спадар Ю. Беленькі як кіраўнік партыйнае дэлегацыі
на перамовах з рэжымам удзельнічаць цяпер у перамовах з гэтым рэжымам.
Мы, спадар Вік, спадзяваліся на разуменьне і салідарнасьць АБСЭ ў гэтым
пытаньні і 4-га траўня змаглі прыняць нават сумесную заяву. Але, тым ня
менш, у сапраўднасьці, нягледзячы на нашыя патрабаваньні, гэты жахлівы
факт застаўся поўнасьцю па-за ўвагай Вашых інтарэсаў і Вашай гнуткай палітыкі.
Складваецца ўражаньне, што з правамі чалавека тут для Вас усё ў парадку:
ня той чалавек трапіў пад боты і дубіны бандытаў…”
Кіраўнік кансультацыйна-назіральнае групы АБСЭ ў Менску Ганс Георг Вік
гэтак пракамэнтаваў ліст Зянона Пазьняка.
(Вік: ) “Гэта няпраўда. Мы выказваліся ў абарону тых, хто быў зьбіты,
незаконна арыштаваны, каго перасьледвалі. Мы выказваліся публічна ў падтрымку
ўсіх гэтых асобаў. Мы абсалютна не адрозьніваем сп. Беленькага ад астатніх,
якія пацярпелі пад час той дэманстрацыі. У прыватнасьці, тады быў арыштаваны
і член групы АБСЭ.
Так што я лічу крытыку сп. Пазьняка неабгрунтаванай. Мы лічым, што Кансэрватыўна-Хрысьціянская
партыя БНФ павінна была б падтрымліваць нашыя спробы дапамагчы Беларусі
ў вельмі крытычны момант. Крытыка на адрас АБСЭ няслушная”.
Самае папулярнае
1