Некалькі адзінак зброі і патроны канфіскаваныя ў доме ў менчука, які напярэдадні забіў супрацоўніка міліцыі, пасьля чаго застрэліўся сам.
«У доме ў менчука канфіскаваныя агнястрэльная зброя, патроны, порах, кнігі, DVD па стралковай зброі», — паведамілі суразмоўцы Інтэрфаксу ў сілавых структурах.
«Паводле папярэдніх зьвестак, па супрацоўніках міліцыі мужчына страляў з рэвальвэра сыстэмы „Наган“ 1940 году, застрэліўся ён з абрэза», — дадалі яны.
Міліцыя Менску і Міністэрства ўнутраных справаў пакуль ніяк не камэнтуюць таго факту, што 8 студзеня аднаго міліцыянта забілі, а другога паранілі.
8 студзеня міліцыянты выехалі ў прыватны сэктар Маскоўскага раёну Менску. Мясцовая жыхарка паведаміла, што на вуліцы Машыністаў нехта страляе па яе сабаку.
Суседзі паказалі на канкрэтнага грамадзяніна.
Міліцыянты спрабавалі загаварыць з мужчынам. Аднак ён дастаў пісталет і пачаў страляць.
36-гадовы міліцыянт Ігар Іванчык загінуў на месцы, яго напарнік быў паранены.
Злачынца схаваўся ў гаражы і там стрэліў сабе ў галаву, піша БелаПАН.
Гараж, дзе затрэліўся забойца
Гаспадар сабакі, з-за якой пачаўся канфлікт
Дом, у якім жывуць гаспадары сабакі
Пальчаткі, якія ляжаць побач з месцам трагедыі. Такімі звычайна карыстаюцца судмэдэксперты
