Лінкі ўнівэрсальнага доступу

Чарнобыльцы — уладам: ня можаце кампэнсаваць страты — прасіце ў Расеі


Рэгіянальны сход прадстаўнікоў няўрадавых дэмакратычных арганізацыяў Гомельшчыны 18 сьнежня падтрымаў рэзалюцыю чарнобыльскіх ліквідатараў, якія патрабуюць аднавіць іх у грамадзянскіх і сацыяльных правах.

Васіль Гайчук з Калінкавічаў, былы зампаліт вайсковай часьці, якая стаяла ўсяго за 10 кілямэтраў ад Чарнобыльскай АЭС і куды ў 1986-88 гадах прызывалі многіх афіцэраў запасу зь Беларусі, кажа, што цяпер ліквідатарам даводзіцца праз суд даказваць свой удзел у мінімізацыі наступстваў катастрофы. Нават калі ў ваенным білеце запісаны тэрмін службы, замацаваны пячаткай часьці й ваенкамату, ліквідатару трэба шукаць сьведкаў службы ў чарнобыльскай зоне.

Васіль Сіліверст
Васіль Сіліверст
Яшчэ адзін вайсковы ліквідатар, інвалід 2 групы Васіль Сіліверст, чыю інваліднасьць Рэспубліканская экспэртная рада ўстанаўленьня прычыннай сувязі захворваньняў з наступствамі чарнобыльскай катастрофы, ня зьвязвае з працай у радыяцыйнай зоне, нагадвае, што ад ранейшага заканадаўства ў справе сацыяльнай абароны ліквідатараў і насельніцтва Беларусі, па сутнасьці, нічога не засталося. Пачынаючы зь верасьня 1995 году, сацыяльныя гарантыі чарнобыльцам пастаянна ўраразаліся й ператварыліся цяпер у шкамуток шчыгрынавай скуры.

З чарговай заменай чарнобыльскіх пасьведчаньняў улады наважаны пазбавіцца нават ад азначэньня «ліквідатар», замяніўшы яго на «пацярпелы».

У прынятай рэзалюцыі ліквідатары патрабуюць аднавіць і ўраўняць ім сацыяльныя гарантыі з тымі, якія ёсьць у чарнобыльцаў ва Ўкраіне і Расеі, альбо выплаціць грашовую канпэнсацыю за страчанае здароўе.

Калі дзяржава ня мае сродкаў на гэта, то няхай дамагаецца ад Расеі як правапераемніцы СССР, заяўляюць чарнобыльцы.

Ваша меркаваньне

Паказаць камэнтары

XS
SM
MD
LG