ТУМАНЫ, МЕСЦАМІ З ДАЖДЖАМІ...
На працягу дня — ад 3 да 7°С цяпла.
ПАДЗЕІ Ў БЕЛАРУСІ І СЬВЕЦЕ:
У Брусэлі — эканамічны Эўрасаміт. Падчас пазачарговай сустрэчы Эўрагрупы будзе абмяркоўвацца пытаньне аб выдзяленьні Грэцыі новага траншу фінансавай дапамогі.
У філіі Нацыянальнага гістарычнага музэю “Дом-музэй I зьезду РСДРП” (Менск, пр. Незалежнасьці, 31а) — адкрыцьцё выставы “Пасьляваенны Менск у карцінах Анатоля Наліваева”. Пачатак аб 11.00.
Паседжаньне круглага стала “Кніжная культура праваслаўнай царквы ў Беларусі” — у залі адукацыйных тэхналёгіяў Нацыянальнай бібліятэкі Беларусі. Пачатак а 15.00.
Барысаўскі БАТЭ ў пятым туры футбольнай Лігі чэмпіёнаў прымае на менскім стадыёне “Дынама” францускі “Ліль”. Пачатак а 20.00.
ЁСЬЦЬ НАГОДА:
Сусьветны дзень дзяцей.
ТАКСАМА Ў ГЭТЫ ДЗЕНЬ:
1648 — каралём Польшчы і вялікім князем ВКЛ абралі Яна Казіміра (сына караля Жыгімонта III Вазы).
1930 — Янка Купала спрабаваў скончыць жыцьцё самагубствам.
1982 — у Менску адкрыўся першы музычны фэстываль “Беларуская музычная восень” (з той пары праводзіцца штогод).
1985 — кампанія “Майкрасофт” упершыню прадставіла апэрацыйнае асяродзьдзе пад назваю “Ўіндаўз” — Microsoft Windows 1.0.
У гэты дзень нарадзіліся:
1858 — швэдзкая пісьменьніца Сэльма Лягерлёф. За сваю творчасьць яна была ўзнагароджаная Нобэлеўскай прэміяй, яе творы перакладаліся па-беларуску.
1899 — беларускі пісьменьнік, перакладнік і крытык Міхась Клімковіч, першы старшыня Саюзу пісьменьнікаў БССР (1934 — 1939), аўтар тэксту Дзяржаўнага гімну БССР.
1901 — беларускі празаік, драматург, перакладнік і крытык Міхась Зарэцкі. Рэагаваў часопіс “Маладняк” (1926 — 1927), быў адным з ініцыятараў стварэньня літаратурнага аб’яднаньня “Полымя”. У 1929-м быў выключаны з камуністычнай партыі за “праявы нацыянал-дэмакратызму”. У 1936-м арыштаваны. 29 кастрычніка 1937 году расстраляны.
1902 — беларускі архітэктар Аляксандар Воінаў. Сярод яго менскіх працаў — Палац піянэраў і школьнікаў, гатэль “Сьвіслач”, будынак былога ЦК КПБ (цяпер — адміністрацыя прэзыдэнта).
1948 — беларуская паэтка Яўгенія Янішчыц. Трагічна загінула ў 1988 годзе, выкінуўшыся з акна сваёй менскай кватэры.
1954 — беларуская гімнастка Антаніна Кошаль, чэмпіёнка Алімпійскіх гульняў 1972 году.
У гэты дзень памерлі:
1910 — расейскі пісьменьнік, публіцыст, мысьляр Леў Талстой.
1925 — польскі пісьменьнік і публіцыст Стэфан Жаромскі, часта званы “сумленьнем польскай літаратуры”.
1950 — расейскі і беларускі публіцыст, крытык, журналіст і літаратар Леў Клейнбарт. Дасьледнік тэндэнцыяў і кірункаў беларускага літаратурнага руху. Першы біёграф Янкі Купалы.
1975 — гішпанскі дыктатар Франсыска Франка. Кіраваў краінаю з 1939 году да сьмерці ў 1975-м.
1998 — расейская палітычная дзяячка Галіна Старавойтава. Была застрэленая ў Санкт-Пецярбурзе пры дасюль не да канца высьветленых абставінах.
ГОД ТАМУ Ў ЗАГАЛОЎКАХ НА САЙЦЕ “СВАБОДЫ”:
Багдановічаву “Пагоню” ў Горках слухалі стоячы
Этап як від катаваньня
Прароцтвы гісторыка з Гарвардзкага ўнівэрсытэту
ЦЫТАТА НА ПАМЯЦЬ:
Сто разоў шукай другой красы,
А тым больш што сьвет даўно ня вузкі!
...Ды калі ты не бязродны сын —
Гавары са мной па-беларуску!
Час — вар'ят, шалёнае таксі.
Толькі ўсё ж ня мысьлю я аб спуску.
Кажаш, што магілы зарасьлі?
Памаўчы са мной па-беларуску.
Зь вершу Яўгеніі Янішчыц “Гавары са мной па-беларуску”