Лінкі ўнівэрсальнага доступу

Эканаміст: Рэальныя прыбыткі непараўнальныя з 1990-мі


Аляксандар Лукашэнка чарговым разам пацьвердзіў абяцаньне, што да канца 2012 году сярэдні заробак будзе даведзены да 500 даляраў. Гэтую ўстаноўку ён паўтарыў, прымаючы з дакладам пра сытуацыю ў эканоміцы кіраўнікоў ураду і Нацыянальнага банку.

«Сярэдні заробак у нас вырас амаль да 4 мільёнаў рублёў. Гэта прыкладна крыху больш за 470 даляраў. Да канца году мы гарантавана выйдзем у сярэднім на 500 даляраў. Пры гэтым рэальныя грашовыя прыбыткі насельніцтва ўзрастуць на 17,5%, а рэальная заробная плата — на 21,5%. Але нельга забывацца, што рост заробнай платы ва ўвязцы з прадукцыйнасьцю працы застаецца нязьменным і найважнейшым прынцыпам нашай працы. Мы павінны даць магчымасьць людзям зарабляць грошы», — заявіў Лукашэнка.

Лукашэнка пры гэтым пахваліўся: курс беларускага рубля застаецца стабільным і няма падставаў хвалявацца, што нешта перашкодзіць выхаду на заплянаваныя паказьнікі.

Тым часам незалежныя экспэрты канстатуюць: апераджальны рост цэнаў на прадукты, тавары і паслугі зводзіць на нуль усе спробы чыноўнікаў адрапартаваць пра дасягненьне 500-даляравага заробку. Як кажа кандыдат эканамічных навук Віктар Цярэшчанка, даведзеная зьверху плянка прыбыткаў дазволіць беларусам хіба што выжываць, але ніяк не шыкаваць:

Віктар Цярэшчанка
Віктар Цярэшчанка
«Можна зрабіць і 500 даляраў, і нават больш. Але ж сёньня ў Беларусі цэны на любы прадукт харчаваньня ўжо вышэйшыя, чым у той жа Літве. Палічыце: у 1990 годзе сярэдні заробак быў 269 рублёў. Зараз — дзесьці 3 мільёны 600 тысяч (мабыць, ужо больш, ня памятаю — дый гэта ня важна). Але галоўнае ў тым, што тады мы сьвініны маглі купіць 160 кіляграмаў (з акругленьнем), а цяпер — толькі 47% ад той сумы. Вось вам рэальныя прыбыткі насельніцтва, якія абваліліся ўдвая. Мы тут нешта фантазіруем, урад на кожным рагу рапартуе — прыбыткі растуць. Ды якія прыбыткі, навошта ўвогуле гэта падкрэсьліваць? Мы можам у кішэні гэтыя грошы не пазапіхваць пачкамі, але ж трэба разумець іншае — што мы можам купіць на гэтыя грошы? Бо адмысловае паняцьце ёсьць у эканоміцы — рэальны кошт грошай...»

Падчас нарады Аляксандар Лукашэнка таксама акцэнтаваў увагу падначаленых на тым, што насельніцтва цяпер найбольш хвалюе рост коштаў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG