Лінкі ўнівэрсальнага доступу

Камітэт ААН выказаўся за вяртаньне кампутараў Віктару Карняенку


Віктар Карняенка
Віктар Карняенка

У Гомель прыйшло рашэньне камітэту ААН па правах чалавека ад 27 ліпеня гэтага году, паводле якога беларуская дзяржава павінна вярнуць Віктару Карняенку як кіраўніку грамадзкага аб’яднаньня «Грамадзянскія ініцыятывы» канфіскаваныя КДБ 6 кампутараў і 2 прынтэры.

Аргтэхніку супрацоўнікі Гомельскай управы КДБ адабралі напярэдадні прэзыдэнцкіх выбараў 2001 году. Будучы ў той час старшынём «Грамадзянскіх ініцыятываў», спадар Карняенка арганізаваў у рэгіёне незалежнае назіраньне, падрыхтаваўшы дзеля гэтага каля 300 назіральнікаў.

Мясцовая ўправа КДБ у межах распачатай крымінальнай справы пра нанясеньне надпісаў на гарадзкіх мурах канфіскавала ў абласнога грамадзкага аб’яднаньня ўсе кампутары. І паколькі яны былі атрыманыя ад замежных фундатараў, то на дадатак абвінаваціла Карняенку ў нямэтавым выкарыстаньні замежнай бязвыплатнай дапамогі.

Грамадзкага актывіста аштрафавалі на суму, эквівалентную 615 далярам ЗША. Неўзабаве праз суд закрылі й аб’яднаньне «Грамадзянскія ініцыятывы».

Віктар Карняенка прайшоў у Беларусі ўсе судовыя інстанцыі, уключна зь Вярхоўным судом, але справядлівасьці не дамогся. Пасьля гэтага ён мусіў зьвярнуцца ў Камітэт ААН па правах чалавека.

У сваім паведамленьні Камітэт ААН канстатуе: «Выкарыстаньне кампутарнага абсталяваньня само па сабе не ўяўляе ніякай пагрозы, таму менавіта на дзяржаве ляжаў абавязак давесьці, дзеля якіх мэтаў зьдзейсьнена іх канфіскацыя. А паколькі абсталяваньне належала грамадзкаму аб’яднаньню, дадзены выпадак сьведчыць пра парушэньне артыкула 22 Міжнароднага пакту пра грамадзянскія й палітычныя правы (права на асацыяцыю). Камітэт таксама лічыць, што дзейнасьць, за якую аўтар быў прыцягнуты да адказнасьці, падпадае пад сфэру дзеяньня артыкула 19 пакту, які гарантуе свабоду шукаць, атрымліваць і распаўсюджваць усялякага роду ідэі й інфармацыю (назіраньне за выбарамі)».

Акрамя таго, у згаданай справе Камітэт угледзеў парушэньне права аўтара на ўдзел у дзяржаўных справах, бо назіраньне за выбарамі — адна з формаў самаарганізацыі грамадзянаў для ўдзелу ў дзяржаўных справах.

Кампэтэнтная міжнародная структура лічыць, што беларуская дзяржава «абавязаная забясьпечыць Віктару Карняенку эфэктыўны сродак прававой абароны, уключна з кампэнсацыяй бягучай велічыні штрафу (615 даляраў ЗША) і любых юрыдычных выдаткаў, якія панёс аўтар, вярнуць канфіскаванае кампутарнае абсталяваньне альбо аплаціць яго бягучы кошт, а таксама прадугледзець іншыя кампэнсацыі і зрабіць захады дзеля прадухіленьня такіх парушэньняў у будучыні».

Беларусь абавязаная таксама прывесьці спрэчныя палажэньні прэзыдэнцкага Дэкрэту № 8 пра замежную бязвыплатную дапамогу ў адпаведнасьць з артыкуламі 19, 22 і 25 Міжнароднага пакту аб грамадзянскіх і палітычных правах.

Раней камітэт ААН па правах чалавека прызнаў незаконнай ліквідацыю праз суд грамадзкага аб’яднаньня «Грамадзянскія ініцыятывы».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG