НАДВОР’Е
У асобных раёнах кароткачасовыя дажджы і навальніцы. Тэмпература днём 25-28 цяпла.
СЁНЬНЯ Ў БЕЛАРУСІ І СЬВЕЦЕ
Афіцыйны навучальны год у Беларусі пачнецца з панядзелка, 3 верасьня.
У Багдадзе чакаюць зь візытым віцэ-прэзыдэнта ЗША Джо Байдэна, ён прыедзе для перамоваў пра стан бясьпекі ў Іраку і Сырыі.
У Ханоі працягнецца міжнародная канфэрэнцыя, прысьвячаная сельскай гаспадарцы, харчовай бясьпецы і зьменам клімату.
У Лёндане паўстане перад судом Рэбека Брукс, былая супрацоўніца мэдыя-магната Руперта Мэрдака. Брукс абвінавачваюць у арганізацыі незаконных падслухоўваньняў тэлефонаў.
У Менску ў галэрэі «Ў» адбудзецца публічная лекцыя Барбары Штайнер «Навошта арганізоўваць праект аб Эўропе?»
Сёньня таксама прэм’ера інтэрнэт-радыё Свабода Jazz. Слухайце ад 12 да 14 гадзіны праз наш сайт. Вядучы — Зьміцер Падбярэзскі.
ТАКСАМА Ў ГЭТЫ ДЗЕНЬ
301 — Заснавана Сан-Марына — самая старая дзяржава Эўропы.
1783 — Паводле падпісанага ў Парыжы мірнага пагаднення афіцыйна скончылася Вайна за незалежнасць Злучаных Штатаў Амерыкі.
1864 — У Стакгольме адбыўся выбух у лябараторыі Альфрэда Нобэля з-за яго вопытаў з нітрагліцырынам. Загінула 6 чалавек, у тым ліку малодшы брат навукоўца — Эміль. Праз 3 гады Нобэль атрымаў патэнт на дынаміт.
1915 — Кайзэраўскія войскі занялі Гародню.
1939 — Вялікабрытанія, Францыя, Індыя, Аўстралія і Новая Зеландыя абвясцілі вайну Нямеччыне.
1953 — Набыла моц Эўрапейская канвенцыя аб абароне праў чалавека і асноўных свабод.
1971 — Абвешчана незалежнасць Катара.
1971 — СССР, Вялікабрытанія, Францыя і ЗША падпісалі дагавор аб статусе Заходняга Бэрліна. Згодна зь ім горад не зьяўляўся часткаю ФРГ.
У ГЭТЫ ДЗЕНЬ НАРАДЗІЛСЯ
1915 — беларускі дырыжор Барыс Райскі.
1927 — беларускі пісьменьнік Алесь Адамовіч. Праўда, гэта «пашпартны» дзень народзінаў. Насамрэч Алесь Адамовіч нарадзіўся 3 верасьня 1926 года. У час вайны маці перапісала яго на год пазней, каб не пагналі на прымусовыя работы ў Нямеччыну.
У ГЭТЫ ДЗЕНЬ ПАМЕРЛІ
1883 — Іван Тургенеў, рускі пісьменнік.
1960 — Міхась Васілёк, беларускі паэт.
1978 — Пётр Татарыновіч, беларускі каталіцкі дзеяч, перакладчык, арганізатар Беларускай секцыі Ватыканскага радыё.
2010 — пры нявысьветленых абставінах загінуў заснавальнік сайту Хартыі-97 Алег Бябенін. Яго знайшлі павешаным на лецішчы.
ЦЫТАТА НА ПАМЯЦЬ
«Зь лёгкай рукі Алеся Адамовіча слова Вандэя імгненна набыло надзвычайную папулярнасьць. Калі ў 1989 годзе на Дзяды ля зачыненай брамы „Маскоўскіх“ могілкаў шчыльныя шыхты міліцыянтаў з усіх бакоў сьвядома сьціскалі шматтысячны натоўп, каб людзі падушылі самі сябе, то адзінае, што мы змаглі тады супрацьпаставіць карнікам — гэта нястомны вокліч: „в а н д э я ! в а н д э я ! в а н д э я !“. Менавіта гэты вокліч задзіночыў натоўп у змагарнае цэлае й дапамог яму выстаяць.»
Валянцін Акудовіч у Слоўніку Свабоды пра слова Вандэя.
МІНУС 365
Адміністратар групы «Вконтакте»: Я афіцыйна заяўляю пра разрыў дамовы пра супрацоўніцтва з КДБ
