Лінкі ўнівэрсальнага доступу

Доўгатэрміновыя назіральнікі АБСЭ прыбываюць у Беларусь


24 жніўня доўгатэрміновыя назіральнікі за парлямэнцкімі выбарамі ў Беларусі ад Бюро ў дэмакратычных інстытутах і правах чалавека АБСЭ пачалі прыбываць у Беларусь.

Пра гэта Інтэрфаксу паведаміў сьпікер варшаўскага офіса БДІПЧ АБСЭ Томас Раймер.

Ён адзначыў, што БДІПЧ АБСЭ накіравала ў Беларусь 36 доўгатэрміновых назіральнікаў за парлямэнцкімі выбарамі, якія адбудуцца 23 верасьня. Экспэрты будуць працаваць парамі ў розных рэгіёнах краіны, назіраючы за працэсам у перадвыбарчы пэрыяд, у дзень выбараў і адразу пасьля іх.

Акрамя таго, за ходам выбараў будуць сачыць 270 кароткатэрміновых назіральнікаў ад БДІПЧ АБСЭ, якія будуць разгорнутыя непасрэдна перад выбарамі па ўсёй краіне ў камандах па два чалавекі для маніторынгу адкрыцьця выбарчых участкаў, галасаваньня, падліку галасоў і падвядзеньня вынікаў.

Раней паведамлялася, што 21 жніўня ў Менску ўжо пачала працу асноўная каманда назіральнікаў ад БДІПЧ АБСЭ, якая складаецца з 11 супрацоўнікаў, што прадстаўляюць 8 дзяржаў-удзельніц АБСЭ.

«Місія назіральнікаў будзе ацэньваць гэтыя выбары на прадмет іх адпаведнасьці абавязальніцтвам АБСЭ і іншым міжнародным стандартам дэмакратычных выбараў, а таксама нацыянальнаму заканадаўству», — сказана на сайце БДІПЧ АБСЭ.

Назіральнікі будуць сачыць за агітацыйнай дзейнасьцю, працай выбарчай адміністрацыі і адпаведных дзяржаўных устаноў, за захаваньнем заканадаўчай базы і дазволам выбарчых спрэчак. У рамках місіі назіральнікі будуць весьці комплексны маніторынг сродкаў масавай інфармацыі.

Пасьля выбараў БДІПЧ зробіць заяву аб папярэдніх высновах на прэс-канфэрэнцыі. Канчатковая справаздача аб назіраньні ўсяго выбарчага працэсу будзе апублікавана прыкладна праз восем тыдняў пасьля завяршэньня назіральнай місіі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG