На Берасьцейшчыне пачалі зьяўляцца першыя пікеты па зборы подпісаў за кандыдатаў у дэпутаты парлямэнту. Пайшлі зьбіральнікі подпісаў і па кватэрах. Карэспандэнт «Свабоды» прайшоўся «ад дзьвярэй да дзьвярэй» са зьбіральнікам Дзянісам Турчаняком.
«Адчыніце, калі ласка, дзьверы ў пад’езд, мы зьбіраем подпісы... Дзякуй», — такімі словамі пачынаецца шлях да выбарцаў Дзяніса Турчаняка, зьбіральніка подпісаў падчас кампаніі «ад дзьвярэй да дзьвярэй».
Спадар Турчаняк зьбірае подпісы за незалежнага кандыдата Аляксандра Мельніка ў першай берасьцейскай выбарчай акрузе:
«Добры дзень, мы зьбіраем подпісы за вылучэньне Аляксандра Мікалаевіча Мельніка ў парлямэнт...»
Спадарыня: «А хто такі Аляксандар Мельнік?»
Турчаняк: «Ён карэнны берасьцеец, яму 54 гады, у дадзены момант працуе інжынэрам. А ўвогуле ў яго вайсковае мінулае, ён лётчык».
Пасьля такога дыялёгу і некаторых іншых пытаньняў спадарыня падпісваецца. Аднак не заўсёды збор подпісаў прыносіць такія хуткія вынікі. Часта людзей няма дома, або жыхары прапісаныя ў іншай выбарчай акрузе:
Спадарыня: «Не, не прапісаная тут...»
Або бываюць і такія адказы:
Спадарыня: «Мы не беларусы...»
Нягледзячы на гэта, кажа Дзяніс Турчаняк, хаджэньне па кватэрах — найбольш эфэктыўны спосаб зьбіраць подпісы:
«Вядома, найбольш эфэктыўна — гэта абыход ад кватэры да кватэры, таму што ахопліваецца менавіта непасрэдная мэтавая аўдыторыя. То бок калі стаіць пытаньне — сабраць хутка і шмат, то найбольш эфэктыўна гэта рабіць, ідучы ад кватэры да кватэры».
Што да стаўленьня да выбараў, кажа Дзяніс Турчаняк, людзі, у асноўным, досыць пасіўныя:
«Вялікі працэнт людзей выказвае да выбараў увогуле нэгатыўныя адносіны, таму што людзі з году ў год падманваюцца ў сваіх спадзяваньнях. Яны бачаць, што галасуюць за адных, а прыходзяць туды зусім іншыя людзі».
На наступнай жа лесьвічнай пляцоўцы сталы мужчына пацьвярджае гэтую думку Турчаняка. Відавочна было, што мужчына нават не разумеў, пра якія выбары ідзе гаворка:
Спадар: «А на каго менавіта?.. Кім ён балятуецца?»
Пасьля непрацяглых тлумачэньняў мужчына запрашае ў кватэру, дастае пашпарт і падпісваецца. Да выбараў ён ставіцца досыць апатычна. Кажа, што пойдзе галасаваць, калі ня трэба будзе адрывацца ад працы:
«Галоўнае, каб працы ў гэты час не было (сьмяецца). У мяне такая праца, у мяне і ў нядзелю бывае праца, і ў суботу...»
Аднак, калі мы ўжо выходзілі, мужчына сказаў усьлед, што лічыць удзел у выбарах проста змарнаваным часам.
Спадар ставіць подпіс за вылучэньне кандыдата ў дэпутаты
Дзяніс Турчаняк перапісвае дадзеныя з пашпарту
Ужо многія незалежныя прэтэндэнты на Берасьцейшчыне заявілі, што сабралі палову неабходных подпісаў за вылучэньне кандыдатам у парлямэнт. Больш за 500 подпісаў сабраў вышэйзгаданы Аляксандар Мельнік, лічбай 650 подпісаў за 4 дні пахваліўся «Свабодзе» Віталь Каратыш, які вылучаецца па Лунінецкай выбарчай акрузе. Збор подпісаў працягнецца да 13 жніўня.
