НАДВОР'Е
Дажджы, навальніцы, парывісты вецер. Тэмпэратура плюс 16–22, на поўдні краіны да +24.
СЁНЬНЯ Ў БЕЛАРУСІ І СЬВЕЦЕ
У мусульманскім сьвеце – пачатак Рамадану.
Грузінскі міністар замежных спраў Грыгол Вашадзе наведае Японію.
У Расеі суд вернецца да разгляду справы жаночага панк-гурту Pussy Riot.
У Менску працягнуць разглядаць скаргі невыязных праваабаронцаў Алега Гулака, Валянціна Стэфановіча і Андрэя Бандарэнкі.
Кампанія «Гавары праўду» прадставіць сьпіс патэнцыйных кандыдатаў у дэпутаты, якіх яна падтрымае.
ТАКСАМА Ў ГЭТЫ ДЗЕНЬ
1797 – упершыню выкананая песьня «Jeszcze Polska nie zginęła», гімн Польшчы. Словы напісаў паплечнік Тадэвуша Касьцюшкі Юзаф Выбіцкі на мэлёдыю, пазычаную ў народнага «Марша Дамброўскага».
1903 – кампанія Форд выпусьціла свой першы аўтамабіль.
1941 – закончылася абарона Берасьцейскай крэпасьці.
1944 – адбыўся няўдалы замах на жыцьцё Адольфа Гітлера падчас сустрэчы фюрэра з вайскоўцамі ў бункеры ў Растэнбургу (Усходняя Прусія). У выніку выбуху бомбы загінулі 24 чалавекі, але самому Гітлеру нічога ня сталася. Пасьля афіцыйнага паведамленьня аб раскрыцьці змовы Гітлер распарадзіўся пакараць сьмерцю каля 200 чалавек.
1969 – амэрыканскія астранаўты высадзіліся на Месяц.
1992 – Вацлаў Гавэл падаў у адстаўку з пасады прэзыдэнта Чэхаславаччыны.
1994 – Аляксандар Лукашэнка пад бел-чырвона-белым сьцягам і на трыбуне з Пагоняй прынёс прысягу ў якасьці першага прэзыдэнта незалежнай Беларусі.
2011 – у Менску і іншых гарадах Беларусі прайшла дзявятая па ліку акцыя, якія ўмоўна называліся маўклівымі. Яе ўдзельнікі скандавалі «Пераменаў!» Затрыманых кідалі ў аўтобусы без нумарных знакаў.
У гэты дзень нарадзіліся:
1924 – беларускі мовазнаўца Ўладзімер Анічэнка, аўтар слоўніка мовы Францішка Скарыны.
1932 – беларускі архітэктар Іван Боўт, сярод яго праектаў – будынкі большасьці сталічных заводаў: гадзіньнікавага, радыё, электратэхнічнага ці халадзільнікаў.
1971 – Зьміцер Вайцюшкевіч, беларускі сьпявак і музыкант.
1981 – лідэр Маладога Фронту, палітвязень Зьміцер Дашкевіч, які знаходзіцца цяпер у зьняволеньні ў Глыбоцкай калёніі нумар 13. Ня выключана, што свой дзень нараджэньня Дашкевіч сустрэне ў карцары. Яго затрымалі напярэдадні прэзыдэнцкіх выбараў і па абвінавачваньні ў хуліганстве асудзілі на два гады.
У гэты дзень памёр:
1926 – пасьля рэзка крытычнага выступу на пленуме ЦК па пытаньнях эканомікі ў выніку сардэчнага прыступу памёр Фэлікс Дзяржынскі, камуністычны дзяяч, кіраўнік ВЧК і ГПУ – карных органаў камуністычнага рэжыму (нар. 1877).
ЁСЬЦЬ НАГОДА
Міжнародны дзень шахмат. Адзначаецца ў дзень заснаваньня Міжнароднай шахматнай фэдэрацыі, ФІДЭ у 1924 годзе.
МУНУС 365
Маўклівая акцыя 20 ліпеня, онлайн
Лябедзька пацьвердзіў ваеннай пракуратуры факты катаваньняў у КДБ
Пасол Літвы: замест Астравецкай АЭС яшчэ можна пабудаваць гіпэрмаркет
ЦЫТАТА НА ПАМЯЦЬ
Клянуся служыць народу Рэспублікі Беларусь, выконваць Канстытуцыю і законы Рэспублікі Беларусь, добрасумленна выконваць ускладзеныя на мяне высокія абавязкі.
Тэкст прысягі беларускага прэзыдэнта.