Лінкі ўнівэрсальнага доступу

Рыгор Грык патрабуе пакараць пікетоўцаў за Цыбліенку


Баранавіцкі грамадзкі дзеяч Рыгор Грык накіраваў лісты ў Генэральную пракуратуру, Сьледчы камітэт і Міністэрства ўнутраных спраў, просячы разабрацца з правамернасьцю пікета, які ладзілі афіцыйныя прафсаюзы і БРСМ падчас суду над Віктарам Івашкевічам 22 траўня.

У лістах Рыгор Грык піша: «22 траўня 2012 году ў судзе Савецкага раёну Менску прайшла сустрэча бакоў у справе „Марына Цыбліенка супраць Віктара Івашкевіча“. Паводле наяўнай інфармацыі, перад пачаткам паседжаньня будынак суду пікетавалі прадстаўнікі афіцыйнай Фэдэрацыі прафсаюзаў. У пікеце ўдзельнічалі 25 чалавек. Празь некаторы час да пікету далучыліся актывісты БРСМ і яшчэ 10 чалавек, якія адмыслова прыехалі з Мазыра. Пры гэтым людзі ў цывільным здымалі на відэа ўсё, што адбывалася ля будынка... Прашу прыцягнуць да вызначанай законам адказнасьці грамадзянаў, якія ўдзельнічалі ў несанкцыянаваных мерапрыемствах... Прашу прыцягнуць да вызначанай законам адказнасьці (узбудзіць крымінальную справу) у адносінах да грамадзянаў у цывільным, якія здымалі на відэа ўсё, што адбывалася».

Спадар Грык паведаміў «Свабодзе», што дабівацца пакараньня пікетоўцаў яго змусіў той факт, што пікет адбываўся ў месцы, не адведзеным для яго паводле закону: «Апошнім часам я замаўляў вельмі шмат пікетаў у Баранавічах, аднак мясцовае кіраўніцтва іх не дазваляе. Аднак выяўляецца, што афіцыйная Фэдэрацыя прафсаюзаў і БРСМ могуць праводзіць пікеты ў тых месцах, не дазволеных законам, і каля адміністрацыйных будынкаў. І ім гэты сыходзіць з рук. І невядома, хто ж дазволіў пікет у не адведзеным для масавых мерапрыемстваў месцы?

Вось я, напрыклад, хацеў нядаўна замовіць пікет і заключыць дамову зь міліцыянтамі, як таго патрабуюць мясцовыя ўлады. Аднак яны са мной дамову не заключылі, сказаўшы, што калі дазволяць, каб і прыходзіў».

Пікет у падтрымку Марыны Цыбліенкі адбыўся 22 траўня. Падчас яго некалькі дзясяткаў чалавек стаялі з расьцяжкамі каля суду Савецкага раёну Менску.

Работніца Мазырскага нафтаперапрацоўчага заводу адсудзіла ў апазыцыйнага палітыка Віктара Івашкевіча 500 тысяч рублёў за тое, што Івашкевіч заклікаў да эўрапейскіх санкцыяў супраць згаданага прадпрыемства.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG